иқтисод
300 ИНШООТИ ҶАШНӢ. НОҲИЯИ ДЕВАШТИЧ СИМОИ ИДОНА МЕГИРАД
Сокинони ноҳияи Деваштич чун дигар шаҳру навоҳии кишвар талош доранд, ки дар пайи ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Ҷашни 30 – солагии Истиқлолияти давлатиро бо дастовардҳои сазовор истиқбол намоянд.
Тавре Маъмур Шарифзода, муовини раиси ноҳия, ба хабарнигори «Ҷумҳурият» гуфт, бахшида ба ҷашни миллӣ дар ҳудуди ноҳия бунёду навсозии беш аз 300 иншооти маъмурӣ, таълимӣ, тандурустию фарҳангӣ ва корхонаҳои истеҳсолӣ ба нақша гирифта шудааст. Соли сипаригашта бо маблағгузории мақомоти иҷроияи маҳаллии ҳокимияти давлатии ноҳия, соҳибкорон ва сармоягузорони маҳаллию хориҷӣ 29 иншоот мавриди истифода қарор гирифт. Имсол эъмори 110 иншооти ҷашнӣ дар назар аст.
- Айни замон дар шаҳраки Ғончӣ сохтмони биноҳои маъмурии шуъбаҳои адлия, нозироти андоз, раёсати молия, дар Ҷамоати деҳоти Яхтан боғчаи бачагона, маркази саломатӣ, муассисаи таҳсилоти миёнаи умумии № 17 ва дар дигар деҳаҳо бунёди иншооти зиёди ҷашнӣ идома дорад, - гуфт Маъмур Шарифзода.
Бинои шуъбаи адлия аз ду ошёна, ҳуҷраҳои корӣ ва толори маҷлис иборат мебошад ва барои кормандони шуъбаи сабти асноди ҳолати шаҳрвандӣ ва идораи нотариалии ноҳия пешбинӣ шудааст. Корҳои сохтмонии бинои маъмурии нозироти андози ноҳия соли гузашта шурӯъ шуда, бинокорон 65 дарсади корҳоро ба субут расондаанд. Бинои маъмурии раёсати молияи ноҳия дуошёна буда, бо арзиши 3 миллион сомонӣ сохта мешавад.
Дар доираи корҳои созандагӣ бунёди боғчаи бачагона ба маблағи 5 миллион сомонӣ барои 240 кӯдак идома дорад. Бо мақсади беҳтар намудани дастрасии аҳолӣ ба хизматрасонии тиббӣ маркази нави саломатӣ дари худро ба мардум боз хоҳад кард.
Ҳамчунин, муассисаи таҳсилоти миёнаи умумии № 17, ки солҳои 80 – уми асри гузашта бунёд ёфтааст, бо харҷи 6 миллион сомонӣ пурра таъмир мегардад.
Кароматулло АТО,
«Ҷумҳурият»
Баёни ақида (0) Санаи нашр: 04.03.2019 №: 46 Мутолиа карданд: 1150