фарҳанг
"БЕҲТАРИН ШЕЪРИ БАЧАГОНА". ОЗМУНЕ, КИ ДЕР БОЗ ИНТИЗОРАШ БУДЕМ
Эълони озмуни Нашрияи расмии Ҷумҳурии Тоҷикистон- рӯзномаи «Ҷумҳурият» якҷо бо мақомоти иҷроияи ҳокимияти давлатии вилояти Суғд бо номи «Беҳтарин шеъри бачагона», аз ҷумла мани унвонҷӯро, ки дар риштаи ин адабиёт таҳқиқ мебарам, бисёр шод намуд. Ин иқдоми нек, воқеан, дар татбиқи сиёсати маорифпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мусоидат мекунад. Инчунин, дар тарбияи насли ояндасози миллат дар роҳи худшиносиву худогоҳӣ ва боло бурдани ҳисси ватандӯстиву дӯстдории сарзамини аҷдодӣ саҳми чашмрас гирифта метавонад.
Шурӯъ аз моҳи июли соли гузашта ҳамаи шеърҳои озмуниро мутолиа мекунам. Тибқи талаботи озмун дар он шоирон ва ҳамаи онҳое, ки эҷод менамоянд, бо нашри се шеъри тозаэҷоди бачагона ширкат меварзанд. Хушбахтона, нисбат ба дигар озмунҳо иштироки эҷодкорон дар ин озмун фаъолтар ба назар мерасад. Дар баробари номҳои шинос номҳову чеҳраҳои навро мебинаму умедам ба рушди адабиёти бачагона бештар мегардад. Ҷавонон, наврасон, хосса хонандагони мактаб, ба мавзӯъҳои муҳим рӯ меоранду саъй ба харҷ медиҳанд, ки шеърҳояшон бозёфт, образу суханҳои шоирона дошта ва мувофиқ ба дунёи зебову рангини кӯдакон бошанд.
Мавриди зикр аст, шумораи шоироне, ки барои бачагон эҷод мекунанд, махсусан солҳои охир хеле ва хеле кам шуданд. Ин озмун собит сохт, ки эҷодкорон дар ин ришта кам нестанд, фақат ба ҷалбу ҳидояту ғамхории махсус ниёз доранд.
Ба ҳисоби инҷониб дар озмун то ба ҳол қариб 70 эҷодкор ширкат варзидааст. То ҷамъбасти озмун, фикр мекунам, ки ин шумора ба 100 нафар мерасад. Ҳамин тавр, дар адабиёти бачагонаи тоҷик 300 шеър ворид мегардад, ки ин дастоварди бузург маҳсуб мешавад.
Бо изҳори сипоси бепоён метавон бо боварӣ гуфт, ки барои миллат ва таърих ин ташаббуси нек бисёр муҳим арзёбӣ мегардад ва доимо дар хотирҳо мемонад.
Муродгул САЪДУЛЛОЕВА, унвонҷӯи Донишгоҳи давлатии Данғара
Баёни ақида (0) Санаи нашр: 13.03.2019 №: 51 Мутолиа карданд: 1114
