иқтисод
ВАЗОРАТ: ҲАҚ БА ҶОНИБИ РӮЗНОМА АСТ
Матлаби хабарнигор Ташрифулло Саъдуллоев «Норасоии нурӣ», ки 4 июли соли 2018 дар рӯзномаи «Ҷумҳурият» (№131) ба нашр расидааст, дар раёсати рустанипарварии Вазорати кишоварзӣ мавриди омӯзиш ва таҳлил қарор гирифт.
Зиёд намудани ҳаҷми содироти маҳсулот ва таъмини амнияти озуқавории мамлакат яке аз ҳадафҳои асосии стратегии кишвар маҳсуб меёбад. Мувофиқи маълумоти оморӣ, соли 2018 дар ҷумҳурӣ дар майдони 656338 гектар зироати кишоварзӣ, аз ҷумла 185817 гектар пахта, кишт шуд. Барои ноил шудан ба ҳосилнокии баланди зироатҳои кишоварзӣ, боғу токзор ва рӯёндани 2-3 ҳосил аз як замин истифодаи самаранок ва оқилонаи нуриҳои минералию органикӣ дар давраи нашъунамои зироатҳо ва ташкили чораҳои мубориза бар зидди ҳашароту зараррасонҳо аҳамияти калон дорад.
Эҳтиёҷоти хоҷагиҳои кишоварзии ҷумҳурӣ аз ҳисоби майдонҳои умумии кишти зироат ва боғу токзор ба нуриҳои минералӣ (фосфорӣ, азотӣ ва калийдор) ҳамасола ба ҳисоби зиёда 500 ҳазор тоннаро ташкил медиҳад. Мувофиқи маълумоти Хадамоти гумруки назди Ҳукумати Ҷумҳурии Тоҷикистон, соли 2018 ба ҷумҳурӣ 163,7 ҳазор тонна нуриҳои минералӣ ворид гардидааст, ки фақат 32,7 фоизи талаботро таъмин месозад.
Нуриҳои минералӣ ба ҷумҳурӣ асосан аз Россия, Қазоқистон, Ӯзбекистон ва Туркманистон ворид карда мешаванд ва нархи онҳо дар бозорҳои мамлакат гарон буда, барои дар давраи нашъунамои зироатҳои кишоварзӣ ва боғу токзор пурра таъмин намудани меъёри андохтани нуриҳои минералӣ ба замин на ҳамаи кишоварзон тавоноии дастрас намудани онҳоро доранд. Албатта, гаронии нархи нуриҳои минералӣ, яъне норасоии онҳо ба ҳосилнокии зироатҳои кишоварзӣ бетаъсир намемонад. Аз ин рӯ, зудтар ба кор андохтани корхонаи нурии «Азот»-и шаҳри Леваканти вилояти Хатлон, ки эҳтиёҷоти кишоварзони мамлакатро бо нуриҳои азотӣ таъмин менамояд, тақозои рӯз аст.
Ҳамчунин, хуб мебуд, ки барои қонеъ гардондани талаботи хоҷагиҳои кишоварзӣ бо ҷалби сармояи дохилию хориҷӣ дар ҷумҳурӣ корхонаҳои хурди истеҳсоли нуриҳои фосфорӣ таъсис дода шаванд.
Фарухиддин НАБИЕВ, сардори раёсати рустанипарварии Вазорати кишоварзӣ
Баёни ақида (0) Санаи нашр: 18.03.2019 №: 54 Мутолиа карданд: 1216
