иқтисод
АШТ. РОҲ БА СӮИ ҲАДАФИ ЧОРУМ
Дар натиҷаи тадбирҳои андешидаи мақомоти иҷроияи маҳаллии ҳокимияти давлатии ноҳияи Ашт фаъолияти соҳибкорону сармоягузорони маҳаллӣ вусъат ёфта, онҳо ба натиҷаҳои назаррас расиданд. Соҳибкорон бо истифода аз имкониятҳои мавҷуда барои таъмини рушди минбаъдаи соҳаи саноат, ташкили коргоҳҳои нави истеҳсолӣ корҳои зиёд анҷом доданд.
Соли сипаришуда танҳо дар Ҷамоати шаҳраки Шайдони ноҳия коргоҳҳои коркарди «Санги хоро» ва дӯзандагии «Гулдаст» сохта ба истифода супурда шуданд.
Корхонаи «Санги хоро» аз ҷониби соҳибкор Абдулҳақ Бобоҷонов бо арзиши 1 миллиону 400 ҳазор сомонӣ ифтитоҳ ёфт, ки дар он беш аз 20 нафар бо ҷойи кори доимӣ таъмин шуд. Корхона бо таҷҳизоти замонавӣ муҷаҳҳаз гардида, ҳар як сол 3000 метри мураббаъ санги хороро коркард менамояд. Инчунин, аз тарафи соҳибкори маҳаллӣ Пулод Ашӯров коргоҳи дӯзандагӣ бо 10 таҷҳизоти муосири корӣ ба фаъолият пардохт, ки иқтидори солонаи он омодасозии 8000 либос аст.
Дар коргоҳи дӯзандагии «Гулдаст» низ 20 таҷҳизоти истеҳсолии барориши Туркия насб шуда, 30 нафар соҳиби ҷойи кори доимӣ гардид.
Ҷиҳати татбиқи ҳадафи чоруми миллӣ – саноатикунонии иқтисодиёти мамлакат соли равон дар ноҳия бунёди 4 корхонаи саноатӣ ба нақша гирифта шудааст. Аз ин, дар Ҷамоати деҳоти Ориён бо ибтикори соҳибкори маҳаллӣ Ҷамшед Бегматов коргоҳи дӯзандагӣ бо харҷи 200 ҳазор сомонӣ ва 20 ҷойи корӣ ба фаъолият шурӯъ намуд. Дар ҷамоатҳои Шодоба ва Шайдон сохтмони коргоҳҳои истеҳсоли хишт, қаннодӣ ва бандубасти мева бо маром идома дорад.
Кароматулло АТО,
«Ҷумҳурият»
Баёни ақида (0) Санаи нашр: 28.03.2019 №: 58 Мутолиа карданд: 750
