иқтисод
АВҶИ БУНЁДКОРИҲО ДАР ШАҲРИ ТУРСУНЗОДА
Сокинони шаҳри Турсунзода баҳри сазовор истиқбол гирифтани Ҷашни 30 - солагии Истиқлолияти давлатии Ҷумҳурии Тоҷикистон омодагии ҳамаҷониба мегиранд.
То таҷлили Ҷашни фархундаи 30 - солагии Истиқлолияти давлатӣ дар шаҳри Турсунзода, дар баробари корҳои сабзу хуррамгардонӣ, беш аз 300 иншооти нав бунёд мешавад. Тибқи иттилои Абдуқодир Вализода, раиси шаҳр, то имрӯз, аллакай, 52 иншооти ҷашнӣ сохта шуда, рӯзҳои наздик боз 11 корхонаи хурди саноатӣ бунёд мегардад.
Яке аз тадбирҳои муҳими роҳбарияти шаҳр ба муносибати ин ҷашни умумимиллӣ “Рӯзҳои мақомоти иҷроияи ҳокимияти давлатӣ дар маҳал” мебошад. Зимни ин чорабинӣ гурӯҳҳои корӣ аз хонаҳои пиронсолону ниёзмандон, муассисаҳои таълимӣ ва бунгоҳҳои тиббӣ дидан намуда, бо ҳаёту фаъолияти сокинони деҳаву маҳаллаҳо аз наздик ошно мегарданд ва барои беҳтар шудани шароити онҳо тадбирҳои зарурӣ меандешанд. Ҳамчунин, тозаву озода нигоҳ доштани кӯчаву маҳал, соҳили ҷӯйю дарёҳо, ривоҷу равнақ додани корҳои созандагию ободонӣ ва кабудизоркунии маҳал аз мақсадҳои дигари чорабинии мазкур аст, ки ҳамагӣ боиси рӯҳбаландии мардум хоҳад буд. Сокинон ин тадбири мақомоти иҷроияи ҳокимияти давлатии шаҳри Турсунзодаро якдилона дастгирӣ намуда, баҳри тозагии кошонаи худ, кӯчаву маҳал бо азму ғайрати дучанд камари ҳиммат бастаанд.
Ҳотам РАБИЕВ, рӯзноманигор
Баёни ақида (0) Санаи нашр: 10.04.2019 №: 68 Мутолиа карданд: 798