фарҳанг
ТОҶИКИСТОН ВА БЕЛАРУС. САҲМИ ҶАМЪИЯТИ ДӮСТӢ ДАР ТАҲКИМИ ҲАМКОРИҲО
Ҷамъияти дӯстии «Тоҷикистон - Беларус» январи соли 2003 дар заминаи Донишгоҳи давлатии техникии Тоҷикистон ба номи М. Осимӣ таъсис дода шуд.
Саҳми ҷамъияти мазкур ҷиҳати барқарор ва тақвият додани робитаҳои илмию фарҳангӣ, муносибати дӯстонаи байни мардуми ҳар ду кишвар калон аст. Моҳи марти соли 2012 дар Ҷумҳурии Беларус Ҷамъияти дӯстии «Беларус - Тоҷикистон» ташкил шуд, ки нависанда, тарҷумони беларус, узви Иттифоқи нависандагони Тоҷикистон Алес Карлюкевич раиси он мебошад. Ҷамъият ба боз ҳам густариш додани равобити дӯстии ҳар ду кишвар мусоидат намуд.
Бояд зикр кард, ки дар ташкили ҷамъият саҳми раиси раёсати Ҷамъияти дӯстӣ ва равобити фарҳангии Тоҷикистон бо кишварҳои хориҷӣ Сайдулло Хайруллоев назаррас аст. Бо дастгирии ҷамъиятҳои дӯстӣ дар ҷумҳуриҳои Тоҷикистону Беларус чорабиниҳои гуногуни илмӣ, фарҳангӣ доир мешаванд. Чунончи, дар Ҷамъияти дӯстӣ ва равобити фарҳангии Беларус бо кишварҳои хориҷӣ шаби назм бахшида ба 1155 – солагии Асосгузори адабиёти классикии тоҷику форс Абуабдуллоҳи Рӯдакӣ доир гашт, ки дар он намояндагони корпусҳои дипломатӣ, адибони тоҷику беларус, донишҷӯён ва тоҷикони муқими Ҷумҳурии Беларус иштирок доштанд. Раиси ҷамъияти дӯстӣ ва равобити фарҳангии Беларус бо кишварҳои хориҷӣ Н.С. Иванова бо самимият ва эҳтироми бузург дар бораи ҳаёту эҷодиёти устод Рӯдакӣ сухан ронд. Дар маркази намоишгоҳи «БелЭкспо»- и шаҳри Минск намоиши байналмилалии китоб бо иштироки ноширон аз 25 кишвар доир гашт.
Аз Тоҷикистон беш аз 100 нусха китоб вобаста ба 40 мавзӯи гуногун ба намоиш гузошта шуд. Ноширони тоҷик бо 6 дипломи ин ҳамоиши фарҳангӣ сарфароз гардиданд.
Котиби Ҷамъияти дӯстии «Тоҷикистон – Беларус», номзади илмҳои техникӣ Исроил Мирзоалиев иброз медорад, ки таъсиси факултети муштарак робита ва ҳамкориҳои илмиро боз ҳам қавитар гардонд. Донишҷӯёни ин факултет таҳсилро дар макотиби олии Беларус идома дода, ихтисосҳои авиатсияи гражданӣ, мошинсозӣ, сохтмонӣ – меъморӣ, энергетика, иқтисоди саноатиро аз худ менамоянд.
Аъзам МӮСОЕВ, Корманди шоистаи Тоҷикистон
Баёни ақида (0) Санаи нашр: 11.04.2019 №: 69-70 Мутолиа карданд: 853
