номаҳо
ИЗҲОРИ СИПОС
Тасаввур кардан мушкил аст, ки шахсони маъюб, хусусан кӯдакони маъюб, чӣ гуна метавонанд роҳи ҳалли мушкилоташонро биёбанд. Охир, аксарияти онҳо қариб ки наметавонанд ҳоҷати худро бароварда созанд, аз ин рӯ, ноилоҷ ба каси дигаре ба ниёзмандӣ рӯ меоранд.
Ин гурӯҳ, албатта, дар оилаҳояшон аз меҳру навозиши падару модарон, наздикону пайвандон баҳраваранд. Аммо чун дили басе ҳассосу захмин доранд, агар нафаре сарашонро сила кунаду сухани хубеашон бигӯяд ё ин ки туҳфае тақдим намояд, зиёдтар шод мегарданд.
Мақсад аз ин навишта он аст, ки маҳз ба рафтору кирдори ҷавонмардонаи нафаре сипос бигӯему арзи миннатдорӣ баён намоем. Ӯ роҳбари Сирки давлатии Тоҷикистон Ашӯр Раҷабов мебошад. Дар ҳама гуна чорабиниҳои ҷамъиятиву давлатӣ қатъи назар аз мушкилиҳо ва зиёд будани ҳаҷми кораш доимо ба кӯдакони маъюб диққати махсус медиҳад, кӯшиш менамояд, ки каме ҳам бошад, бо ин роҳ дили шикаставу маҷрӯҳи онҳоро шод гардонад. Ӯ бо ин кирдори некаш на танҳо ин кӯдакони маъюб, балки модарони онҳоро низ дилбардорӣ менамояд.
Ташкилоти мо, ки асосан бо кӯдакони имконияташон маҳдуд сарукор дорад, дар рӯзҳои иду ҷашнвораҳо ба ӯ рӯ меорад, зеро бовар дорад, ки тамоми чораҳои заруриро дар ин маврид меандешад ва ёрӣ мерасонад. Зикри иштироки ройгони ин кӯдакон дар барномаҳои ҳунарӣ кофист, ки ҳақиқати навиштаҳои моро собит бисозад. Албатта, дар баробари изҳори сипос ба ин марди ғамхор изҳор медорам, ки дигар роҳбарон дар доираи имконоташон ба маъюбон, хоса кӯдакони маъюб, таваҷҷуҳи махсус зоҳир бикунанд. Боло рафтани сатҳи маърифати онҳо ба нафъи миллат мебошад.
С. НЕЪМОНОВА,
роҳбари Муассисаи кӯдакони имконияташон
маҳдуди «Боварӣ ба фардо»
Баёни ақида (0) Санаи нашр: 11.04.2019 №: 69-70 Мутолиа карданд: 2726