ҳуқуқ
899 ҚОНУНШИКАНӢ. ЯК МОҲИ ЯК НОҲИЯ
Кормандони шуъбаи Бозрасии давлатии автомобилии ШВКД дар ноҳияи Абдураҳмони Ҷомӣ танҳо дар як моҳи гузашта 899 қонуншикании вобаста ба роҳу нақлиётро ошкору сабт карданд.
Шумори зиёди чунин қонуншиканиҳо дар ҳолест, ки тибқи мушоҳидаҳои чандрӯзаи мо, вобаста ба таъмини амният ва бехатарии ҳаракат дар роҳ, тамбашавию ба танзим даровардани ҳаракати воситаҳои нақлиёти мусофиркаш, пешгирии вазъи садаманокӣ, масъулони соҳа дар ноҳия пайваста рейду амалиёт гузаронда, корҳои фаҳмондадиҳӣ миёни ронандагонро ба роҳ монданд. Мутаассифона, тибқи омори дастрасшуда, вайрон намудани қоидаҳои ҳаракат дар роҳ аз ҷониби ронандагон коҳиш наёфтааст.
Ба гуфтаи сардори ШБДА ШВКД дар ноҳия, майори милитсия Акбар Шарбатуллозода аз шумораи умумии қоидавайронкуниҳои 21 ҳолати қонуншиканӣ барои баррасӣ ба суди ноҳия ва 157 маврид ба дигар шаҳру навоҳии мамлакат ирсол гардидааст. Гузашта аз ин, дар робита ба қонуншиканиҳои ошкоршуда 50481 сомонӣ ҷарима ситонда шуд.
Ҷиҳати иҷроиши талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» бошад, нисбат ба 6 ронанда протоколҳои маъмурӣ тартиб дода шуда, барои чораҷӯӣ ба суд ирсол гардидааст.
- Кормандони шуъбаи Бозрасии давлатии автомобилии ноҳия баҳри пешгирии ҳодисаҳои роҳу нақлиёт мунтазам чораҷӯӣ намуда, ҳодисаи роҳу нақлиёте, ки бо иштироки кӯдакону наврасон ба амал меоянд, дар байни муассисаҳои таҳсилоти миёнаи умумӣ, ҷамоатҳо ва дигар ташкилоту идораҳо мавриди муҳокима қарор медиҳанд. Ҳамчунин, шуъба дар ҳудуди ноҳия аз ҳисоби толибилмони муассисаҳои таълимие, ки дар ҳамшафати роҳҳои автомобилгард ҷойгиранд, ҷиҳати ҳамкорӣ ва таъмини бехатарии ҳаракат дар роҳ дар назди муассисаҳо бо таъмини либоси махсус нозирони наврасро ташкил намудааст, - гуфт Акбар Шарбатуллозода.
Қурбон АҲМАДЗОДА, «Ҷумҳурият»
Баёни ақида (0) Санаи нашр: 16.04.2019 №: 72 Мутолиа карданд: 850
