иқтисод
ДАНҒАРА. ТУХМИИ ХУШСИФАТ - ОМИЛИ ФАРОВОНҲОСИЛӢ
Пахтакорӣ бахши муҳиму пешбарандаи соҳаи кишоварзии ноҳияи Данғара ба ҳисоб меравад. Аз ин рӯ, майдони кишти ин соҳаи сердаромад ҳар сол зиёд карда, истеҳсоли он афзоиш дода мешавад. Мусаллам аст, ки пахтакорӣ соҳаест, воқеан ҳам, барои таъмини саноати сабук бо ашёи хоми саноатӣ ва таъмини мардуми деҳот бо ҷойи кор шароит муҳайё месозад. Ҳамзамон, ба хоҷагиҳои деҳқонӣ манфиати хуби молиявӣ оварда, барои ғанӣ гардидани буҷети маҳаллӣ мусоидат мекунад.
Тавре Орзу Неъматов, иҷрокунандаи вазифаи сардори раёсати кишоварзии ноҳияи Данғара, зимни суҳбат гуфт, мусоид омадани боду ҳавои баҳори имсола имконият дод, ки то имрӯз 80 дарсади кишти пунбадона ба анҷом расонда шавад. То ҳол дар майдони 3 ҳазору 400 гектар тухмии навъҳои аълосифати «Флора», «Ирам», «Флеш» ва «Хатлон – 2014», ки ба иқлими ноҳия мусоид мебошанд, кишт карда шуд. Имсол мувофиқи дурнамо бояд дар майдони 4 ҳазору 370 гектар пумбадона кишт карда шавад, ки назар ба ҳамин давраи соли сипаришуда 370 гектар зиёд аст. Мувофиқи маслиҳати мутахассисони соҳа бояд дар ин миқдор замин зиёда аз 400 тонна тухмӣ кошта шавад. То имрӯз ба маблағи 1 миллиону 200 ҳазор сомонӣ тухмии навъҳои хушсифат харидорӣ шудааст.
Пахтакорони ноҳия дар мавсими киштукор аз 190 техникаи гуногуни кишоварзӣ, аз ҷумла 40 тухмипошак, самаранок истифода бурда, рӯзе дар 150 - 200 гектар чигит мекоранд. Онҳо мақсад доранд, ки киштро дар рӯзҳои наздик ба анҷом расонанд. Барои гирифтани ҳосили хуб кишоварзон аз усулҳои босамари агротехникӣ истифода менамоянд.
- Пахта зироати нозук ва заҳматталаб буда, ҳосили хуб ба даст овардан танҳо бо роҳи риояи қатъии қоидаҳои агротехникӣ имконпазир аст. Ҳамзамон, мувофиқи маслиҳати мутахассисони соҳа баъди пайдо шудани ҳашароти зараррасон (шира, тортанаккана ва ғайра), ки боиси талаф ёфтани ҳосил мегарданд, бояд бар зидди онҳо заҳрхимикатҳои мувофиқ истифода бурда шаванд,- гуфт Орзу Неъматов.
Ҳоло кишти пунбадона дар 225 хоҷагии деҳқониву кооперативҳои истеҳсолии ҷамоатҳои деҳоти Оқсу, Лолазор, Сангтӯда, Корез ва Исмат Шарифов бомаром идома дорад. Пахтакорони зафарпешаи ноҳия мақсад доранд, ки соли равон истеҳсоли ин ашёи хоми муҳими саноатиро ба 7 ҳазор тонна расонанд.
Холназар КАСИРОВ, «Ҷумҳурият»
Баёни ақида (0) Санаи нашр: 17.04.2019 №: 73 Мутолиа карданд: 963
