ҳуқуқ
ПУРСИШ ва ПОСУХ
Ба саволҳо Фарҳод Тоиров - узви Иттифоқи адвокатҳои Ҷумҳурии Тоҷикистон, адвокати шаҳри Бохтар ва Сиҷоуддин Ҳаётов, адвокати кабинети адвокатӣ дар ноҳияи Рашт, ҷавоб доданд.
Зимнан, агар хонандагони гиромӣ вобаста ба масъалаҳои ҳуқуқӣ пурсише доранд, метавонанд бо телефони 238 - 54 - 16 ба мо муроҷиат намоянд.
- Беш аз се сол аст, ки нигоҳубин ва таъминоти моддии фарзандонамро дар танҳоӣ бар дӯш дорам. Собиқ ҳамсарам аз иҷрои уҳдадориҳои падариаш, аз ҷумла додани алимент, қасдан саркашӣ карда, ману фарзандонамро аз ҷиҳати моддӣ таъмин намекунад. Дар чунин ҳолат ман метавонам, ки ӯро аз ҳуқуқи падарии фарзандонам маҳрум созам?
МАЛИКА,
шаҳри Бохтар
- Тибқи муқаррароти моддаи 69 Кодекси оилаи Ҷумҳурии Тоҷикистон дар ҳолати иҷро накардани уҳдадориҳои падару модарӣ, аз ҷумла додани алимент ва қасдан саркашӣ кардан аз он, имкон дорад, ки ҳуқуқи падарӣ ва ё модарӣ бекор шавад. Яъне, танҳо дар сурати рафтори гунаҳкоронаи волидайн бо асосҳои дар ин модда пешбинигардида, онҳоро аз ҳуқуқи падару модарӣ маҳрум кардан мумкин аст. Саркашии волидайн аз иҷрои уҳдадориҳои худ оид ба тарбияи кӯдакон мумкин аст, дар ғамхорӣ накардан ба рушду камолоти ҷисмонӣ ва ахлоқӣ, хониш, тайёр намудани онҳо ба меҳнати муфиди ҷамъиятӣ зоҳир гардад. Номгӯи асосҳои маҳрум кардан аз ҳуқуқи падару модарӣ, ки моддаи 69 Кодекси оила муқаррар кардааст, маҳдуд аст ва он ба таври васеъ маънидод карда намешавад. Ҳар як асоси номбурдаи моддаи мазкур ба таври мустақилона асос барои маҳрум кардан аз ҳуқуқи падару модарӣ мебошад. Аз иҷрои уҳдадориҳои падарӣ қасдан саркашӣ кардани падари фарзандонатон дар он бояд зоҳир гардад, ки вай дидаю дониста ба таври доимӣ дар бораи тарбияи маънавӣ, инкишофи ҷисмонӣ, таълимгирии фарзандон ғамхорӣ зоҳир накунад. Зимнан, агар ба таври доимӣ ба тарбияи фарзандонаш машғул нашуда, кӯдаконро бо сарулибос, маводи ғизоӣ ва дигар эҳтиёҷот таъмин накунад, дар ин ҳолат шумо метавонед, ки бо талабот оид ба маҳрум кардани ӯ аз ҳуқуқи падарӣ ба суд бо даъво муроҷиат намоед.
- Падарам мехоҳад, ки манзили истиқоматии худро ба ману бародарам туҳфа кунад. Тариқи қонунӣ гирифтани ин туҳфа чӣ гуна аст?
Сайдалӣ БЕГОВ,
ноҳияи Рашт
- Тибқи муқаррароти боби 11 Кодекси граждании Ҷумҳурии Тоҷикистон ҳар як шаҳрванд ҳуқуқи бегона кардани амволи шахсии худро дорад, аз ҷумла падари шумо низ. Барои амалӣ кардани ин мақсадаш бояд ба идораи нотариалии давлатии ноҳияи Рашт бо пешниҳод намудани ҳуҷҷатҳои лозимӣ муроҷиат намояд. Баъд аз ба имзо расондани шартномаи туҳфа манзили истиқоматӣ, ки шумо дар он ҳамчун туҳфагиранда қабул мешавед, санадро дар мақомоти дахлдори ноҳия ба қайд гирифта, сипас ҳуқуқ ба моликиятро пайдо мекунед.
Шуъбаи ҳуқуқи рӯзномаи
“Ҷумҳурият”
Баёни ақида (0) Санаи нашр: 01.05.2019 №: 83 Мутолиа карданд: 960
