Паёми навбатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, тамоми паҳлуҳои ҳаёти ҷомеаи Тоҷикистонро дар бар  гирифтааст. Он барҳақ  хусусияти инсонмеҳварӣ дорад. Зеро дар Паёми Пешвои муаззами миллат таъмини  шароити арзандаи зиндагӣ барои ҳар як  шаҳрванди кишварамон дар маркази таваҷҷуҳ қарор дорад. Ҳадаф аз эълон гаштани Солҳои рушди деҳот, сайёҳӣ ва ҳунарҳои мардумӣ низ аз ҳамин манбаъ сарчашма мегирад.
Дар ин ҳуҷҷати сарнавиштсоз, аз ҷумла масъалаҳои илму маориф, ки аз соҳаҳои  афзалиятноки Ҳукумату давлат дониста мешаванд, рушд ва дурнамои он ҳамаҷониба таҳлил шудааст. Воқеан ҳам, бо маблағгузориҳои Буҷети давлатӣ базаи моддӣ, техникӣ ва кадрии муассисаҳои таълимӣ беҳтар мегардад.
Ҳамзамон, Пешвои миллат ба баланд бардоштани сатҳи донишу малакаи касбии омӯзгорон эътибор дода, гузаштан аз аттестатсияи омӯзгоронро дар се сол як маротиба муайян намудаанд. Чунин талабот дар шароити феълӣ, ки ба рушди технологияи муосир  алоқаманд аст, хеле муҳим ва саривақтист. Зеро сатҳу сифати таълим, дараҷаи  донишомӯзии хонандагон, маҳорат ва  таҷрибаи касбии мо - омӯзгорон, ба он вобаста мебошад. Аз ин рӯ, омӯзгорон мувофиқи дастуру ҳидояти Пешвои муаззами миллат, ки аз Паём бармеояд, фаъолияти худро дар таълиму тарбияи  насли наврас ба роҳ мондаанд. Чунки дар ин самт баробари падару модарон, инчунин, омӯзгорон низ масъулият доранд.
Ин нуктаи Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ бояд асоси фаъолияти мо дар тарбияи насли наврас қарор гирад: «Мо ҳар амали некеро, ки ба шукронаи  истиқлолияти озодӣ ва соҳибватаниву соҳибдавлатӣ анҷом медиҳем, барои худамон, фарзандонамон, наслҳои ояндаамон, Ватани азизу  маҳбубамон - Тоҷикистон мекунем, зеро ин Ватан ва ин давлат аз худи мост ва онро ба ҷойи мову шумо каси дигар обод намекунад».

Ситора ИСКАНДАРОВА,
омӯзгори МТМУ № 87,
 ноҳияи Синои шаҳри Душанбе