Мақомоти иҷроияи маҳаллии ҳокимияти давлатии ноҳияи Айнӣ бо ташкили комиссияи махсус дар ҳайати муовини якуми раиси ноҳия Суҳроб Раҳматзода, сардорони  бахшҳои беҳдошти замин ва обёрӣ Зулфон Шаҳобов,  кишоварзӣ Ф. Эров ва  саҳмдорони хоҷагиҳои деҳқонии мавзеи Урметан матлаби рӯзноманигор Ташрифулло Саъдуллоевро зери унвони  «Урметан. Кишоварзон ду ҳосил мегиранд, агар…», ки 18 апрели соли равон дар рӯзномаи «Ҷумҳурият», № 74 (23 677) нашр шудааст, мавриди баррасӣ қарор дод.
Дар он сухан бобати нарасидани оби полизӣ дар хоҷагиҳои деҳқонии «Мадм», «Урметан»  ва «Лангар» меравад. Пойгоҳҳои обкашии «Устообид 1» ва «Устообид 2» дар ҷойҳои номувофиқ сохта шуда, қубурҳои иншоот мутаносибан дар баландии 90 ва 70 метр кашида шудаанд, ки ин ҳолат интиқоли обро аз дарё ба қитъаи даркории замин мушкил месозад. Инчунин, хатҳои барқ аз зеристгоҳ то пойгоҳҳои обкашӣ аз масофаи дур оварда шудаанд, аз ин сабаб шиддатнокии барқ пайваста тағйир ёфта, сабаби зуд – зуд аз кор мондани муҳаррикҳо мегардад.
Гузашта аз ин, пойгоҳҳои обкашии «Устообид» аз се силсила иборат буда, бо технологияи серхарҷи аҳди шӯравӣ бунёд шудаанд ва барқи зиёд сарф менамоянд. Ин боиси харҷи бисёр мегардад. Тибқи хулосаи мутахассисон, истифодаи пойгоҳҳои обкашии «Устообид» бо технологияи кунунӣ ғайриимкон буда, аз назари иқтисодӣ манфиатовар нест.
Ҳамзамон, масъулони соҳа бо мақсади бо оби полизӣ таъмин намудани даштҳои Амсо, Айн ва Устообиди ноҳия бо мутасаддиёни лоиҳаи «Барқарорсозии системаи обёрӣ ва беҳтаркунии идоракунии он дар ҳавзаи дарёи Зарафшон» ҷиҳати ҳалли муаммои ҷойдошта корбарӣ намуда истодаанд. Мутасаддиёни лоиҳа ва  масъулони соҳаи кишоварзии ноҳия ба хулоса омаданд, ки аз сойи Мадм то мавзеъҳои болозикр тариқи лӯлаҳои қутрашон 500 мм оби полизӣ оваранд. Ҷиҳати ҳалли масъалаи мазкур мақомоти иҷроияи маҳаллии ҳокимияти давлатии ноҳия якҷо бо сохторҳои дахлдори ҷумҳуриявӣ тадбирҳои зарурӣ андешида истодааст.

 

Суҳроб  РАҲМАТЗОДА,
муовини якуми раиси ноҳияи Айнӣ