номаҳо
ТЕЪДОДИ МАЙДОНЧАҲОИ ВАРЗИШ МЕАФЗОЯД, АММО...
Солимии ҷомеа таҳти таваҷҷуҳи ҳамешагии Ҳукумати кишвар қарор дорад ва ҳамин аст, ки тайи солҳои ахир баҳри ҷалби бештари сокинони кишвар ба тарзи ҳаёти солим, дар гӯшаву канори гуногуни мамлакат, аз ҷумла вилояти Хатлон, бунёди иншооти варзиш вусъати тоза касб намудаанд.
Бино ба иттилои мудири бахши варзиши раёсати кор бо ҷавонон ва варзиши вилояти Хатлон Алишер Гулов, танҳо давоми чор моҳи соли равон дар ҳудуди вилоят як маҷмаа, 28 майдонча ва 2 толори варзиш сохта ба истифода дода шудааст. Мавсуф афзуд, ки бунёди чунин иншоот дар шаҳру ноҳияҳои вилоят идома дошта, дар маҷмӯъ, то Ҷашни 30 - солагии Истиқлолияти давлатии Ҷумҳурии Тоҷикистон беш аз 80 толор ва 300 майдончаи варзиш мавриди баҳрабардорӣ қарор хоҳанд гирифт.
Вале, бо вуҷуди ин пешравиҳо, мутаассифона, баъзе камбудиҳо низ ба назар мерасанд, ки садди роҳи ҷалби бештари аҳолӣ ба варзиш мегарданд. Аз ҷумла, яке аз мушкилоти асосӣ нархи баланди истифодаи майдончаҳои варзиш мебошад. Ва ин проблема ба он иншооте дахл дорад, ки аз ҷониби соҳибкорон бунёд ёфтаанд. Чуноне зимни суҳбат бо сокинони маҳаллаҳои гуногуни вилоят маълум гашт, як соат истифодабарии онҳо аз 50 то 80 сомониро ташкил медиҳад, ки на ҳама имкони пардохти онро доранд.
Албатта, дар қаламрави вилоят майдончаҳое, ки истифодабариашон ройгонанд, ҳастанд, аммо онҳо имкони қабули ҳамаи хоҳишмандонро надоранд. Бартар аз ин, ҳоло дар баъзе минтақаҳо сохтмони чунин иншоот дар арафаи анҷомёбӣ аст. Аз ҷумла, масъули бахши кор бо ҷавонон ва варзиши ноҳияи Дӯстӣ Низорамоҳ Олимова иброз дошт, ки бо мақсади ба роҳ мондани хизматрасонии ройгон, ба наздикӣ дар маркази ноҳия майдончаи варзиш ба истифода дода мешавад. То истиқболи солгарди Ҷашни Ваҳдати миллӣ ҳамзамон бунёди боз ду майдонча ба анҷом расида, то Ҷашни 30 - солагии Истиқлолияти давлатии Ҷумҳурии Тоҷикистон дар маҳалҳои гуногуни ноҳия боз як толори бузург ва 11 варзишгоҳи хурд мавриди баҳрабардорӣ қарор мегирад.
Бешубҳа, ин тадбир барои то ҷое рафъ намудани мушкилии ҷойдошта мусоидат намояд ҳам, онро пурра бартараф нахоҳад кард. Аз ин лиҳоз, соҳибмулконро мебояд баҳри ҷалби бештари сокинон на танҳо нархҳои ҷориро паст фуроранд, балки барои ашхос аз оилаҳои камбизоат истифодбарии майдончаҳоро ройгон намоянд, ки ин амали хайру инсондӯстона хоҳад буд.
Анвар ҲАФИЗОВ, сокини вилояти Хатлон
Баёни ақида (0) Санаи нашр: 03.06.2019 №: 105 Мутолиа карданд: 3527
