ҳуқуқ
ҶИНОЯТ ва ҶАЗО
РИШВАСИТОНӢ
Корманди комиссариати ҳарбӣ
бо 9000 сомонӣ ба даст афтод
Корманди комиссариати ҳарбии ноҳияи Тоҷикобод Маҳмадраҳим Раҳимов, ки мехост бар ивази 9000 сомонӣ ба шаҳрвандон билети ҳарбӣ диҳад, аз ҷониби маъмурони Агентии назорати давлатии молиявӣ ва мубориза бо коррупсия боздошт шуд.
Тибқи иттилои дафтари матбуоти агентӣ, боздошти корманди комиссариати ҳарбӣ дар пайи муроҷиати шаҳрванд «Ҳ», сокини деҳаи Лангари Шоҳи ноҳия Тоҷикобод имконпазир гардидааст. Ин шаҳрванд дар номае ба агентӣ арз намудааст, ки Маҳмадраҳим Раҳимов барои додани билети ҳарбии ғайриқобили хизмат ба номи ду бародараш аз ӯ 9000 сомонӣ талаб дорад.
Дар пайи ин муроҷиат нисбат ба М. Раҳимов бо моддаи 247 қисми 2 банди «г» (қаллобӣ бо истифода аз мақоми хизматӣ) парвандаи ҷиноятӣ оғоз шуда, корманди комиссариати ҳарбӣ ҳангоми гирифтани маблағи мазкур дастгир шудааст.
Ҳоло дар робита ба ин ҳолат тафтишоти пешакӣ идома дорад.
ОҚИБАТИ МАСТӢ
Моҷарое, ки бо марг анҷом ёфт
Вазорати корҳои дохилӣ таҳқиқи ҳодисаи дар бозори «Панҷшанбе» - и шаҳри Хуҷанд баамаломадаро, ки боиси марг шуд, оғоз намуд.
Тибқи иттилои маркази матбуоти вазорат, ҳоло, дар робита ба ин ҳодиса, кормандони милитсия марди 47 - солаи сокини ноҳияи Бобоҷон Ғафуровро ҳамчун гумонбар дар қасдан расондани зарари вазнин ба саломатӣ дастгир кардаанд.
Боздоштшуда 5 июни соли ҷорӣ дар дар майдони Регистон дар ҳолати мастӣ бо як сокини дигари ноҳияи мазкур, ки манбаъ аз ӯ марди 52 - сола ном мебарад, муноқиша карда, ӯро шадидан лату кӯб намудааст. Дар натиҷа ҷабрдида ҷароҳатҳои вазнини ҷисмонӣ бардошта, дар беморхона ба ҳалокат расидааст.
Нисбат ба марди гумонбар бо моддаи 110 қисми 3 (қасдан расондани зарари вазнин ба саломатӣ) Кодекси ҷиноятии Ҷумҳурии Тоҷикистон парвандаи ҷиноятӣ оғоз шудааст.
ҚАЛЛОБӢ
Истифода аз мақоми хизматӣ
боиси ҷавобгарӣ шуд
Парвандаи ҷиноятӣ нисбат ба сармутахассиси Корхонаи давлатии фаръии «Бақайдгирии молу мулки ғайриманқул» дар шаҳри Ҳисор Бобомурод Назаров баъд аз анҷоми тафтиши пешакӣ ба суд ирсол гардид.
Бобомурод Назаров моҳи январи соли ҷорӣ бо ҷурми талаби пора ба маблағи 5000 ҳазор сомонӣ аз ҷониби кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон боздошт гардид. Номбурда ин маблағро барои тайёр намуда додани шиносномаи ҳавлидорӣ аз як шаҳрванд талаб кардааст, ки ҳангоми гирифтани он ба даст афтод.
Парвандаи ҷиноятӣ нисбат ба ӯ бо моддаи 247 қисми 2 бандҳои «б, в,» (қаллобӣ бо расондани зарари ҷиддӣ ба шаҳрванд ва истифода аз мақоми хизматӣ) бандубаст шудааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 12.06.2019 №: 110 Мутолиа карданд: 808
