маориф
ИНСТИТУТИ КОНФУТСИЙ. КУРСҲОИ САНЪАТ НАМОИШИ ҲИСОБОТИИ ХЕШРО ТАШКИЛ КАРДАНД
Институти Конфутсийи назди Донишгоҳи миллии Тоҷикистон дар анҷоми соли таълимӣ намоиши ҳисоботии хонандагони курси санъатро баргузор намуд. Он чун як барномаи ҷолибу рангин ва фаромӯшнашаванда дар хотири иштирокчиён ва тамошогарон то дер гоҳ боқӣ хоҳад монд.
Донишҷӯёни бахши санъат, ки тӯли як басти таълимӣ собитқадамона меҳнат намуда, истеъдоди худро сайқал доданд, дер боз мунтазири ба рӯи саҳна баромадан буданд. Намоиши ҳисоботии дарси санъат ин навбат на танҳо диққати волидони донишҷӯёну дӯстдорони ҳунарро, балки таваҷҷуҳи намояндагони расонаҳои хабарии Ҷумҳурии Мардумии Чинро ба худ ҷалб намуд. Ҳамчунин, намоиш диққати намояндагони ширкатҳои чинии дар Тоҷикистон қарордоштаро низ ба худ кашид.
Ҳамаи толибилмони дарсҳои санъати Институти Конфутсий дар намоиши навбатӣ иштирок доштанд. Дар саҳнаҳои умумӣ ҳамаи толибилмон ба рақс омада, саҳнаҳои намоиширо боз ҳам ҷолибтар мегардонданд. Чорабинии мазкур аз ду қисмат: намоиши ҳунарҳо берун аз саҳна ва дар рӯи саҳна иборат буд. Тамошогарон ҳар ду қисмати намоишро бо рағбати том тамошо карданд. "Аз ин ду якеро ҳамчун беҳтарин интихоб кардан, бароямон хеле мушкил буд", - мегуфтанд мухлисон.
Дар намоиши берун аз саҳна намунаҳои ҳунарҳои хаттотии чинӣ, рассомӣ, санъати чойнӯшӣ, гиреҳбандии чинро ба маъраз гузоштанд. Тамошогарон ба ҳунари волои толибилмон баҳои баланд доданд.
Пас аз нӯшидани як пиёла чой, бо ба гӯш расидани садои дилнишини асбоби мусиқӣ тамошогарон вориди толор шуданд. Дар ин ҷо онҳоро тамоман дунёи дигар интизор буд. Навбат ба савту навои дилнишини чинӣ расид. Донишҷӯёни гурӯҳи мусиқӣ бо садои хушу маҳорати волои навозандагии хеш мухлисонро ба хурӯш оварданд. Донишҷӯёни гурӯҳи рақси чинӣ низ бо маҳорати нотакрори хеш фазои хушу дилкашеро барои тамошогарон фароҳам оварданд.
Донишҷӯён низ дар навбати худ аз устодонашон барои тӯли як басти таълимӣ заҳмат кашидан изҳори миннатдорӣ менамуданд. Ҳамаи онҳо бо як овоз мегуфтанд, ки бесаброна мунтазири оғози басти таълимии нав ҳастанд.
Институти Конфутсийи назди
Донишгоҳи миллии Тоҷикистон
Баёни ақида (0) Санаи нашр: 24.06.2019 №: 118 Мутолиа карданд: 1500
