фарҳанг
АСАРИ ДРАМАТУРГИ ТОҶИК ДАР САҲНАИ ТЕАТРИ МОСКВА
Чанде пеш дар Маркази минтақавии дастгирии ташаббусҳои ҷамъиятӣ ва стратегии Россияю Қирғизистон нахустнамоиши Театри "Аён" аз рӯи асари драманависи тоҷик Ҷумъа Қуддус "Нубувати охирин" баргузор гардид.
Намоиш инсонҳоро ба сулҳ, ваҳдату ягонагӣ даъват менамояд. Нахустнамоиши "Нубувати охирин" собит намуд, ки офарандагонаш дар роҳи расидан ба ҳадафи неки худ қадами ҷиддӣ гузоштаанд.
Таҳиягарони намоиш режиссёр, рассом ва актёри қирғиз Садир Согинбоев ва шоира Айнаш Козубоева мебошанд. Нақшҳоро ҷавонони соҳибистеъдод - муҳоҷирони меҳнатии қирғиз иҷро карданд.
Айнаш Козубоева, узви фаъоли маҳфили "Савту каломи Маскав", дар фарҷоми намоиш иброз дошт: «Дар маҳфиле бо Садир Согинбоев ба хулосае омадем, ки театри муҳоҷиронро созмон диҳем. Сари асарҳои таҳияшаванда низ хеле баҳс намуда, қарор додем, ки аз асари ҳамтои тоҷикамон Ҷумъа Қуддус оғоз намоем».
Садир Согинбоев нахуст дар омӯзишгоҳи рассомии шаҳри Фрунзе (Бишкек) таҳсил намуда, сипас ВГИК - ро хатм кардааст. Чанд муддат дар Киностудияи "Қирғизфилм" ҳам ифои вазифа менамояд. Дар даҳҳо филм, аз ҷумла "Бодиягард" - и студияи "Қазоқфилм", нақшҳои ҷолиб офаридааст. Ӯ ду сол қабл ба Москва омада, ба таъсиси гурӯҳи театрии муҳоҷирон машғул гашт.
Садир Согинбоев ҳикоят кард, ки соли 2006 Театри тамошобини ҷавони шаҳри Бишкеки Ҷумҳурии Қирғизистон ба Фестивали байналмилалии санъати театрӣ асари Ҷумъа Қуддус "Нубувати охирин» - ро пешниҳод карда, соҳиби шоҳҷоиза гардид. Намоиш, ҳамчунин, ба чанд ҷоизаи дигар, аз ҷумла барои иҷрои беҳтарин нақшҳои зан ва мардро, сазовор гашт. Худи Садир Согинбоев барои ороиши асар соҳиби ҷоиза гардида буд. Таҳиягари он Алмаз Сарликбоев барои таҳияи асар сазовори унвони Ҳунарпешаи халқии Қирғизистон гардид.
Ёдовар мешавем, ки нависандаи тоҷик Ҷумъа Қуддус муаллифи беш аз сад драма, се романи таърихӣ, 6 повест ва даҳҳо ҳикоя буда, пйесаҳои ӯ дар аксари театрҳои Тоҷикистон, инчунин, дар ҷумҳуриҳои Қирғизистон ва Қазоқистон, саҳнавӣ шудаанд. Ин таҳияи панҷуми асари мазкур мебошад. Бори нахуст он дар Театри давлатии академии драмаи ба номи А. Лоҳутӣ рӯи саҳна омада буд.
Екатерина ИВАШЕНКО, театршинос, шаҳри Москва
Баёни ақида (0) Санаи нашр: 04.07.2019 №: 127 Мутолиа карданд: 1003
