иқтисод
РӮШОН. БА САНООБОД ОБ МЕОЯД
Деҳаи Саноободи Ҷамоати деҳоти ба номи Муъминшо Абдулвосиев дар сарҳади ғарбии ноҳияи Рӯшон воқеъ буда, дар он айни ҳол аҳли 48 хоҷагӣ зиндагӣ мекунанд. Аҳолии ин деҳаи дурдаст солҳои зиёд аст, ки ба оби ошомиданӣ дастрасӣ надоранд ва аз оби дарёи Панҷ истифода мекунанд. Дар фасли зимистон оби дарё соф аст, аммо бо оғози фасли баҳор ярчу селу тарма истеъмоли ин обро ғайриимкон гардонда, хатари эҳтимолии мубтало шудани сокинон ба ҳар гуна бемориро афзоиш медиҳанд.
Тавре Нозигул Абдулвоҳидова, раиси ҷамоати деҳот, зикр намуд, Солҳои рушди деҳот, сайёҳӣ ва ҳунарҳои мардумӣ эълон гардидани солҳои 2019 - 2021 барои рушди деҳот заминаи мусоид гузошт. Мақомоти иҷроияи ҳокимияти давлатии ноҳия мушкилоти сокинони деҳаи Саноободро ба назар гирифта, дар ҳамкорӣ бо шарикони рушд ба бунёди хати оби ошомиданӣ оғоз намуд. Масофаи байни деҳа ва сарчашмае, ки аз он об кашида мешавад, 8 километрро дар бар мегирад.
- Ба шарофати сулҳу ваҳдат, фазои орому осуда, талошҳо ва дастуру супоришҳои Пешвои миллат муҳтарам Эмомалӣ Раҳмон шароити зиндагии сокинон дар деҳоти мамлакат рӯз то рӯз беҳтар мегардад. Мо аз ин хеле хушҳолем ва умедворем, ки дар ояндаи наздик симои деҳаи мо низ дигаргун хоҳад гашт. Кашидани хати оби ошомиданӣ ба деҳа аз иқдомҳоест, ки ба беҳтар гардидани сатҳи зиндагии аҳли деҳа ва рушди ҳамаҷонибаи он мусоидат мекунад. Аз он ҳам хеле хушбинем, ки ҷавонони мо дар корҳои созандагиву ободонии диёр бо дили гарм саҳмгирӣ мекунанд. Алъон 15 нафар аз ҷавонони маҳаллӣ ба васлу насби лӯлаҳои пластикӣ машғуланд. Бештари корҳоро коргарон тавассути техника анҷом медиҳанд. Дар ин ҷо солҳои наздик иншооти азими саноатии мамлакат – Неругоҳи барқи обии "Санообод" бунёд мегардад. Ҷиҳати ташкили инфрасохтори одитарин барои бунёдгарони ин иншоот аз имрӯз замина мегузорем. Ҳамзамон, ҷавонони маҳаллӣ дар бунёдкориҳо ширкат варзида, малакаи созандагии худро сайқал медиҳанд. Хати оби нӯшокӣ бошад, то Ҷашни 28 - солагии Истиқлолияти давлатӣ мавриди баҳрабардорӣ қарор мегирад, - гуфт Н. Абдулвоҳидова.
Раҳмони ГУЛЗОР, «Ҷумҳурият»
Баёни ақида (0) Санаи нашр: 16.07.2019 №: 134 Мутолиа карданд: 857
