ҳуқуқ
ТАНЗИМ. ДАР РАШТ ШАШ ҲОЛАТИ ҚОНУНШИКАНӢ ОШКОР ШУД
Дар нимсолаи аввали соли равон дар ноҳияи Рашт 6 ҳолати риоя нагардидани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ошкор гардида, нисбат ба шахсони қонуншикан чораҳои дахлдори қонунӣ андешида шуданд.
Тавре Мустафо Хоркашов, мудири бахши дин, танзими анъана ва ҷашну маросими мақомоти иҷроияи ҳокимияти давлатии ноҳия, изҳор дошт, дар ин давра 394 маъракаи тӯйи домодию арӯсӣ, маросими чил ва сол ба қайд гирифта шуда, дар онҳо 65 сар чорвои калон ва 262 сар чорвои хурд забҳ гардидааст. Хароҷоти умумии маъракаҳо ба ҳисоби миёна 1086872 сомониро ташкил медиҳад.
Дар назди 61 ташкилоту муассисаи ноҳия, ки на камтар аз 30 нафарӣ корманд доранд, комиссияҳои ҷамъиятӣ таъсис ёфта, риояи талаботи қонуни мазкур ва чораҳои пешгирии қонуншиканӣ зери назорати ҷиддӣ қарор гирифтаанд.
Дар ин давра масъулони бахши дин, танзими анъана ва ҷашну маросими ноҳия фаъолияти комиссияҳои доимии ҷамоатҳои деҳоти Ҷафр, Навдӣ, комиссияҳои ҷамъиятии бахши №76-и БДА “Амонатбонк” ва беморхонаи марказии ноҳияро мавриди санҷиш қарор дода, баҳри ислоҳи камбудиҳо ва ҷоннок намудани фаъолияти комиссияҳои ҷамъиятӣ тавсияҳои зарурӣ доданд.
Тибқи қонунгузорӣ, шахсони воқеӣ ва ҳуқуқӣ уҳдадоранд, ки ҷашну маросимро бо риояи талаботи қонун баргузор карда, мақомоти ваколатдор ва комиссияҳои доимии маҳаллиро аз баргузории тӯю маросим огоҳ намоянд. Аммо санҷишҳо муайян намуданд, ки шаҳрвандон гоҳо дар баргузории маросими азодорӣ мақомоти ваколатдорро огоҳ намекунанд, ки боиси ба ҷавобгарӣ кашидани онҳо мегардад.
Худодод ЗАЙНИДДИН,
"Ҷумҳурият"
Баёни ақида (0) Санаи нашр: 16.07.2019 №: 134 Мутолиа карданд: 988
