ҳуқуқ
ҶИНОЯТ ва ҶАЗО
ЗАМИНФУРӮШӢ
Раиси ҷамоат бо ин айб ба ҷавобгарӣ кашида шуд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти Бахтиёр Бобобеков, раиси Ҷамоати деҳоти Эсанбойи ноҳияи Рӯдакӣ, ба далели ришваситонӣ хабар дод.
Тибқи иттилои маркази матбуоти агентӣ, раиси ҷамоат барои ба рӯйхати эҳтиёҷмандони замин дохил намудани шаҳрванд «А» ва ба ӯ ҷудо намудани 0,16 гектар қитъаи замини наздиҳавлигӣ 10000 сомонӣ талаб кардааст. Номбурда моҳи апрели соли ҷорӣ аз ин маблағ 5000 сомониашро гирифта, ҳангоми гирифтани боқимондаи маблағ дар ҷойи ҳодиса дастгир шуд.
Дар ин асос нисбат ба Бахтиёр Бобобеков бо моддаи 319 қисми 1 Кодекси ҷиноятии Ҷумҳурии Тоҷикистон (гирифтани пора аз ҷониби шахси мансабдор … ) парвандаи ҷиноятӣ оғоз шуда, тафтишоти пешакӣ идома дорад.
ПУЛИ ҚАЛБАКӢ
Милитсия нагузошт, ки 17 500 евро ба муомилот барояд
Кормандони мақомоти корҳои дохилӣ як сокини ноҳияи Рӯдакиро ба гумони тайёр кардан ва ба муомилот баровардани пул ё коғазҳои қиматноки қалбакӣ дастгир намуданд.
Дар ин бора сомонаи Вазорати корҳои дохилӣ хабар дода, навиштааст, ки гумонбар марди 28 - сола буда, 17 ҳазору 500 еврои қалбакиро ба мақсади истифода бурдан бо худ доштааст. Дар ҳамин ҳол, Раёсати ташхисӣ - криминалистии ВКД муайян намудааст, ки он аз 35 адад купюраҳои 500 - еврогии қалбакӣ иборат буда, бо истифода аз технологияи компютерӣ ва дастгоҳи чопии ранга тайёр шудааст.
Бино ба иттилои манбаъ, ҳоло ин ҳодиса мавриди тафтиш қарор дорад.
ДУЗДӢ
Шахси қаблан судшуда боз даст ба ҷиноят зад
Дар асоси муроҷиати як зан ба ШВКД-1 дар ноҳияи Синои пойтахт, кормандони милитсия марди 47 - солаеро бо гумони дуздӣ боздошт намуданд, ки қаблан низ бо чунин ҷурм ҷазо дода шудааст.
Маркази матбуоти ВКД бо нашри ин хабар иттилоъ медиҳад, ки номбурда дар ошхонае, воқеъ дар кӯчаи Айнии пойтахт ҳамёни зани ба милитсия хабардодаро бо ҷамъи 6000 сомонӣ, 1 адад телефони мобилӣ ва атриёти занона дуздида, аз ҷойи ҳодиса ғайб мезанад.
Бино ба гузориши манбаъ, боздоштшуда ҷойи зисти доимӣ надошта, пеш бо моддаҳои 244 Кодекси ҷиноятии Ҷумҳурии Тоҷикистон ва 222 Кодекси ҷиноятии Ҷумҳурии Ӯзбекистон суд шудааст. Боздошти фаврии вай дар пайи содир намудани ҷинояти навбатӣ бо истифода аз навори камераҳои мушоҳидавӣ, ки дар ҳамин ошхона насб шудаанд, муяссар гардидааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 18.07.2019 №: 136 Мутолиа карданд: 875
