иқтисод
СОҲИБКОРОНИ ҶУМҲУРИИ КОРЕЯ: "ТОҶИКИСТОН ШАРИКИ БОЭЪТИМОД АСТ"
Дар доираи сафари расмии Сарвазири Ҷумҳурии Корея ба Тоҷикистон дар Китобхонаи миллии Тоҷикистон форуми соҳибкорони ду кишвар баргузор гардид, ки дар ҷараёни он беш аз 50 лоиҳа аз соҳаҳои афзалу ояндадор ва имкониятҳои сармоягузории мамлакат муаррифӣ шуд.
Тавре Фаррух Ҳамрализода, раиси Кумитаи давлатии сармоягузорӣ ва идораи амволи давлатӣ, гуфт, Тоҷикистону Кореяи Ҷанубӣ давоми 27 соли муносибатҳо дар бисёр соҳаҳо ҳамкории устувору натиҷабахшро ба роҳ мондаанд. Тоҷикистон дорои сарватҳои ғании табиӣ ва Кореяи аз лиҳози технология пешрафта имконияти бамаротиб тавсеа бахшидани ҳамкории тиҷоратию иқтисодиро доранд.
- Форуми мазкур барои густариши чунин ҳамкориҳо мусоидат намуда, дар доираи он соҳибкорони ду ҷумҳурӣ ҷиҳати ташкили корхонаҳои муштараки истеҳсолӣ санадҳои ҳамкорӣ ба имзо мерасонанд. Тайи 5 моҳи соли равон ҳаҷми савдои хориҷии кишвари мо бо Ҷумҳурии Корея 12,9 миллион долларро ташкил дод, ки ин нишондиҳанда дар қиёс ба ҳамин давраи соли гузашта 3,6 миллион доллар зиёд аст, - тавзеҳ дод Фаррух Ҳамрализода.
Дар идома Канг Мёнг Су, роҳбари комиссияи доимии тиҷоратӣ, муовини вазири савдо, саноат ва энергетикаи Ҷумҳурии Корея, аз ҳамкориҳои судманд бо Тоҷикистон изҳори хушнудӣ намуд.
- Тоҷикистон дар зарфи солҳои соҳибистиқлолияш таҳти роҳбарии Президенти кишвар Эмомалӣ Раҳмон дар байни кишварҳои ҷаҳон, хусусан Ҷумҳурии Корея, ҳамчун кишвари осоишта, рӯ ба тараққӣ ва ҳамкори боэътимод шинохта шудааст. Ман ҳамвора вазъи иқтисодию фазои сармоягузории Тоҷикистонро таҳлил менамоям ва ба хулоса омадам, ки ин ҷо барои роҳандозии ҳамкориҳо дар самтҳои иқтисодӣ, бавижа энергетика, канданиҳои фоиданок, коркарду содироти мева, техникаю технология, манфиатбахш хоҳад буд, - гуфт ӯ.
Ҳамчунин, намояндагони ширкатҳои «GAIA ENERGY CO., Ltd», «Keumcheong Pharm», «Richware system Co., Ltd» ва «World Oil Korea Co., Ltd» ба шароиту имкониятҳои соҳибкорию сармоягузории Тоҷикистон баҳои баланд дода, барои фаъолияти муштарак бо ҳамтоёни тоҷикашон ҳавасмандӣ зоҳир намуданд. Намояндагони 4 ширкати ватанӣ ва 5 ширкати Кореяи Ҷанубӣ фаъолияти муваффақонаи худро бо мисолҳои мушаххас ба иштирокчиёни форум муаррифӣ намуданд.
Дар хотимаи вохӯрӣ иштирокдорон ҳаҷми гардиши маҳсулот байни ду кишварро назар ба имкониятҳо хеле кам арзёбӣ карда, изҳори боварӣ намуданд, ки дар асоси густариши ҳамкориҳо он афзун хоҳад гашт.
Ташрифулло САЪДУЛЛОЕВ,
«Ҷумҳурият»
Баёни ақида (0) Санаи нашр: 19.07.2019 №: 137 Мутолиа карданд: 975
