ҳуқуқ
ТАНЗИМ. МАҚОМОТИ ПРОКУРАТУРА 599 ҲОЛАТИ ҚОНУНШИКАНИРО ОШКОР КАРД
Дар нимсолаи аввали соли ҷорӣ аз ҷониби мақомоти прокуратура 599 ҳолати қонуншиканӣ вобаста ба танзими анъана ва ҷашну маросим ошкор гардида, нисбат ба шахсони гунаҳкор 299 парвандаи маъмурӣ оғоз ва 300 нафар масъулони танзими ҷамоатҳо ва бахш оид ба корҳои дин ба ҷавобгарии интизомӣ кашида шудаанд.
Дар ин бора Раҳмон Юсуф Аҳмадзод, Прокурори генералии Ҷумҳурии Тоҷикистон, зимни нишасти матбуотӣ иттилоъ дод. Бино ба гузориши Прокурори генералӣ, дар ин давра татбиқи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» низ дар меҳвари таваҷҷуҳ қарор гирифта, дар рафти санҷишҳои прокурорӣ оид ба риояи ин санади ҳуқуқӣ қонуншиканиҳои зиёде ошкор шудаанд. Вобаста ба ин, 2230 нафар ба ҷавобгарии маъмурию интизомӣ кашида шуда, 103 парвандаи ҷиноятӣ оғоз гардидааст. Зикр шуд, ки дар зарфи шаш моҳи соли ҷорӣ аз тарафи ноболиғон ва бо иштироки онҳо 386 ҷиноят сабт шудааст, ки нисбат ба ҳамин давраи соли гузашта 169 ҷиноят кам мебошад.
Зимни нишасти матбуотӣ омори умумии ҷиноятҳои дар ин давра сабтшуда эълон шуд, ки маҷмӯан, 12549 ҷиноятро дар бар мегирад. Тавре таъкид шуд, муфаттишони прокуратура тафтиши 2198 парвандаи ҷиноятиро ба итмом расонда, 2084 адади онро нисбат ба 2337 нафар барои баррасӣ ба суд ирсол намуданд. Дар рафти тафтиши парвандаҳои ҷиноятӣ 69,1 миллион сомонӣ зарар, аз ҷумла 7,9 миллион сомонӣ, ба манфиати давлат барқарор шудааст.
Дар давоми шаш моҳ аз ҷониби мақомоти прокуратура вобаста ба назорати иҷрои қонунҳо ва ҳифзи ҳуқуқу озодиҳои инсон ва шаҳрванд 3393 санҷиш гузаронда шудааст. Ҷиҳати бартараф намудани қонунвайронкуниҳои ошкоршуда 15 ҳазор санади эътиноии прокурорӣ татбиқ ва бо натиҷаи баррасии онҳо 24 250 нафар ба ҷавобгарии интизомӣ ва моддию маъмурӣ кашида шуда, дар ин робита 1881 парвандаи ҷиноятӣ оғоз гардидааст.
- Ба баррасии саривақтӣ ва пурраву холисонаи муроҷиатҳои шахсони воқеию ҳуқуқӣ дар мақомоти прокуратура диққати хосса зоҳир гардида, дар ин давра 6982 муроҷиат баррасӣ шуд. Мақомоти прокуратура дар оянда низ ҷиҳати таҳкими қонуният, тартиботи ҳуқуқӣ ва мубориза бар зидди ҷинояткорӣ тамоми чораҳоро меандешад, - таъкид кард Раҳмон Юсуф Аҳмадзод.
Лашкар ШАРИФЗОДА, «Ҷумҳурият»
Баёни ақида (0) Санаи нашр: 19.07.2019 №: 137 Мутолиа карданд: 1008
