маориф
МАОРИФ. ДАСТОВАРДҲОИ НАВИ ХОНАНДАГОНИ ТОҶИК
Чанде пеш дар шаҳри Бати Британияи Кабир 60 - умин Олимпиадаи ҷаҳон аз фанни математика («60th IMO 2019») баргузор гардид. Дар он 642 хонанда аз 112 кишвари дунё иштирок намуд ва Ҷумҳурии Тоҷикистонро Ҷаҳонгир Урақов, хонандаи литсей барои хонандагони болаёқат дар шаҳри Душанбе, Наимҷон Хонҷонов, Шоҳрух Исоматов, Ҷамшед Рустамов, Шоҳрухи Маҳмадҷон ва Вазир Пиров, хонандагони литсей - интернати тоҷикӣ – русии «Ҳотам ва ПВ» дар шаҳри Душанбе, муаррифӣ намуданд.
Дар ҷамъбасти олимпиада Наимҷон Хонҷонов сазовори ҷои дувум (медали нуқра), Ҷаҳонгир Урақов ҷои сеюм (медали биринҷӣ), Шоҳрух Исоматов ва Ҷамшед Рустамов бо сипосномаи кумитаи тадорукоти олимпиадаи мазкур сарфароз гардиданд.
Моҳи гузашта дар шаҳри Тел - Авиви Исроил ҳамин гуна Олимпиада аз фанни физика («50th IPhO 2019») доир шуд. Дар он хонандагон аз 78 кишвари дунё иштирок намуданд ва Тоҷикистонро 5 хонанда муаррифӣ кард. Дар ҷамъбасти он хонандагони литсей – интернати тоҷикӣ – русии «Ҳотам ва ПВ» дар шаҳри Душанбе Далер Пиров ва Фараҳманд Ҳасанов сазовори ҷои сеюм (медали биринҷӣ) ва Иззатулло Юсуфов, хонандаи литсей барои хонандагони болаёқат дар шаҳри Душанбе сазовори ифтихорномаи кумитаи тадорукот гардиданд.
Ёдовар мешавем, ки хонандагони кишвар аз аввали сол дар 17 олимпиадаи байналмилалӣ, ки дар Россия, Қазоқистон, Беларус, Таиланд, Малайзия, Руминия, Италия, Ҳиндустон, Латвия, ИМА, Исроил ва Англия баргузор шуданд, фаъолона иштирок намуда, сазовори 204 медал, аз ҷумла 49 тилло, 57 нуқра ва 98 биринҷӣ, гардиданд.
Б. БАҲОДУР,
«Ҷумҳурият»
Баёни ақида (0) Санаи нашр: 29.07.2019 №: 144 Мутолиа карданд: 2613
