иқтисод
СУҒД. 100 ҲАЗОР ГЕКТАР ЗАМИНИ БЕКОРХОБИДА ШОДОБ МЕГАРДАД
Раҷаббой Аҳмадзода, раиси вилояти Суғд, дар нишасти матбуотӣ оид ба натиҷаҳои фаъолияти соҳаҳои хоҷагии халқи вилоят тайи шаш моҳи сипаришуда аз муваффақияти корхонаҳои саноатӣ ҳарф зада, таъкид намуд, ки кормандони соҳа ҷиҳати татбиқи ҳадафи чоруми миллӣ - саноатикунонии босуръат тавонистанд, ки дар ин муддат ҳаҷми истеҳсоли маҳсулотро ба 5 миллиарду 665 миллион сомонӣ расонанд. Ин нишондод нисбат ба ҳамин давраи соли 2018 бо назардошти индекси нархҳо 8,3 дарсад зиёд аст. Дар шаш моҳ дар вилоят 59 корхонаи нави саноатии муҷаҳҳаз бо технологияи замони муосир мавриди баҳрабардорӣ қарор гирифта, 1734 сокини маҳаллӣ бо ҷойи кор таъмин гардид.
- Рушди иқтисодиёт аз ҳисоби афзоиши ҳаҷми истеҳсоли маҳсулоти содиротӣ яке аз ҳадафҳои асосии Ҳукумати ҷумҳурӣ аст, ки дар вилояти Суғд дар ин самт назар ба солҳои пешӣ дастовардҳо чашмрасанд. Аз ҷумла, гардиши савдои хориҷии вилоят дар нимсолаи аввали соли равон ба 1 миллиарду 11,9 миллион доллар баробар гардид, ки нисбат ба ҳамин давраи соли гузашта наздики 8 миллион афзудааст. Айни замон вилоят бо 52 кишвари хориҷӣ робитаҳои тиҷоратӣ дорад. Дар ин муддат содироти семент 2 баробар ва меваи тару тоза наздики 2,5 маротиба аз вилоят ба хориҷи кишвар бештар гардидааст. Ҳамчунин, ҷалби сармояи хориҷӣ 170 миллион долларро ташкил дод, ки аз ин зиёда аз 80 миллион сармояи мустақим аст. То таҷлили Ҷашни 30 - солагии Истиқлолияти давлатии Тоҷикистон мувофиқи татбиқи лоиҳаҳо дар вилоят то 200 миллион доллари ИМА ҷалб намудани сармояи хориҷӣ пешбинӣ шудааст, - изҳор дошт Раҷаббой Аҳмадзода.
Зикр гардид, ки бо назардошти рушди соҳаи кишоварзӣ ва коркарди маҳсулоти соҳа ояндаи наздик ба гардиши кишоварзӣ ворид кардани зиёда аз 100 ҳазор гектар замини бекорхобида дар мавзеъҳои Ашти Калон ва Қизилии Деваштич бо сармояи хориҷӣ дар нақша мебошад.
Раиси вилоят дар ҷараёни нишаст доир ба таҳкими ҳамкориҳо бо соҳибкорони кишвари ҳамсоя - Ӯзбекистон, ба эътидол омадани вазъи сарҳад байни ҷумҳуриҳои Тоҷикистону Қирғизистон, вусъат додани корҳо дар ҷодаи рушди сайёҳӣ, таъмини муътадили аҳолии вилоят бо оби ошомиданӣ, бунёди мактабу синфхонаҳои нав ва дастгирии оилаҳои ниёзманд ба суолҳои хабарнигорон посухҳои мушаххас дод.
Ҷовиди АШТӢ, «Ҷумҳурият»
Баёни ақида (0) Санаи нашр: 02.08.2019 №: 148 -149 Мутолиа карданд: 936
