фарҳанг
РӮЗГОРЕ БАРОИ ИБРАТ
Дар рушди илми таърихи ватанӣ ва равияҳои он як зумра донишмандони забардаст саҳми бузург гузоштаанд. Маҳмуд Ҳакимович Маликов, бешубҳа, аз ҳамин зумра мебошад. Маҳмуд Маликов дар тифлӣ аз меҳрубонии падар ва навозиши модар маҳрум гашт. Ҳамин тавр, бо мадади хешу табор мактаби ҳафтсолаи деҳа ва соли 1959 Омӯзишгоҳи педагогии Орҷоникидзеобод (ҳозира Ваҳдат) - ро бо баҳои аъло хатм намуд.
Пас аз адои хизмати ҳарбӣ ҳуҷҷатҳояшро ба шуъбаи таърихи Донишгоҳи давлатии Тоҷикистон ба номи В. И. Ленин (Донишгоҳи миллии Тоҷикистон) супорид ва аз устодони зиндаёд Б. И. Искандаров, З. Ш. Раҷабов, М. Эркаев, Д. Е. Хайтун, А. Г. Слонимский, Ҳ. Н. Назаров, Т. Р. Каримов, И. М. Саидмуродов ва М. Бобохонов сабақ мегирифт, ҳамзамон, дар нишасту маҳфил ва конференсияҳои илмӣ фаъолона иштирок ва маърӯза мекард.
Пас аз хатми донишгоҳ Маҳмуд Маликов ба ҳайси ассистент ба фаъолияти омӯзгорӣ пардохт ва дар мудати кӯтоҳ рисолаи номзадиашро дифоъ намуд. Ӯ ба сифати дотсент ва педагоги бомаҳорат корро идома дода, оид ба таърихи энергетикаи Тоҷикистон чандин рисолаву мақолаҳои илмӣ ба нашр расонд.
Солҳо мавсуф вазифаҳои ноиби ректор оид ба корҳои таълим ва илми Донишкадаи педагогии шаҳри Кӯлобро ба уҳда дошт. Масъулиятшиносияш буд, ки рисолаи докториро соли 1988 дар Донишгоҳи давлатии педагогии Москва бомуваффақият дифоъ намуд.
Профессор Маҳмуд Маликов соли 1991 ректори Донишкадаи давлатии педагогии шаҳри Кӯлоб таъйин гардид. Дар муассисаи мазкур факултету шуъбаҳои нав кушода шуданд.
Чанде дар вазифаи мудири кафедраи таърихи сиёсии Донишгоҳи миллии Тоҷикистон фаъолият дошт. Бо таъсис ёфтани Донишгоҳи славянии Россияву Тоҷикистон ба вазифаи мудири кафедраи фанҳои иҷтимоӣ - гуманитарӣ таъйин гардид. Номбурда тавонист дар як муддати кӯтоҳ дар кафедра устодони пуртаҷрибаву донишманд Ҳ. Пирумшоев, Ю. Яқубов, Р. Абулҳаев ва дигаронро сарҷамъ намуда, пояи илмӣ – методии кафедраро мустаҳкам созад.
Мавсуф дар ДДОТ ба номи Садриддин Айнӣ низ дар тарбияи донишҷӯёну тайёр намудани мутахассисони унвондор саҳм гузоштааст.
Имрӯз низ профессор Маҳмуд Маликов фаъолияти таълимию илмии худро дар Донишгоҳи славянии Россияву Тоҷикистон ва Донишгоҳи миллии Тоҷикистон идома дода, ба таълиму тарбияи шогирдон ва таҳқиқоти илмӣ машғул мебошад. Номбурда муаллифи 7 рисола ва мақолаҳои зиёди илмӣ, тадқиқотӣ ва оммавӣ мебошад.
А. ҲУСАЙНОВ,
С. САЙНАКОВ,
Т. НАҶМУДДИНОВ,
омӯзгорони факултети таърихи ДДОТ ба номи С. Айнӣ
Баёни ақида (0) Санаи нашр: 13.08.2019 №: 155 Мутолиа карданд: 2067
