фарҳанг
ТАКМИЛИ ИХТИСОС. БАРНОМАИ ДАВЛАТӢ АМАЛӢ МЕГАРДАД
Такмили ихтисос ва бозомӯзии кормандони соҳаи маориф ва илм аз самтҳои асосии сиёсати Ҳукумати Ҷумҳурии Тоҷикистон ба ҳисоб рафта, дар Вилояти Мухтори Кӯҳистони Бадахшон он дар доираи санадҳои меъёрию ҳуқуқии соҳаи маориф, аз ҷумла Стратегияи миллии рушди маорифи Ҷумҳурии Тоҷикистон то соли 2020 ва Қарори Ҳукумати Ҷумҳурии Тоҷикистон аз 28 июли соли 2017 «Дар бораи «Барномаи давлатии рушди системаи такмили ихтисос ва бозомӯзии касбии кормандони соҳаи маорифи Ҷумҳурии Тоҷикистон барои солҳои 2018-2022» ба роҳ монда шудааст.
Нахуст ба омӯзгорони муассисаҳои таълимии шаҳру ноҳияҳо аз ҷониби кормандони раёсати маориф машғулиятҳо ва семинарҳо оид ба фаъолияти таълимӣ-тарбиявӣ, ҳуҷҷатгузорӣ, идоракунии соҳа ва дигар масъалаҳои пешрафти илму маориф гузаронда шуданд. Илова бар ин, бо маблағгузории ташкилоти ҳамкор барои омӯзгорони муассисаҳои таҳсилоти миёнаи умумӣ дар доираи барномаи «Нигоҳдошт ва бехатарии оби ошомиданӣ», «Рушди ҳамаҷонибаи мактаб» ёрии методӣ расонда шуда, омӯзгорони марказҳои инкишофи кӯдакон низ аз ин кумак бархурдор гардиданд. Бо кумаки шарикони рушд барои 61 нафар директорон, раисони кумитаҳои падару модарон, роҳбарони ҷамоатҳои шаҳраку деҳот семинар дар мавзӯи «Ҳамкории мактаб ва ҷомеа дар таҳкими фаъолияти маркази инкишофи кӯдакон» гузаронда шуд. Айни замон барои омӯзгорон ва мураббиёни муассисаҳои инкишофи кӯдакон 2 курси 15-рӯза ва 9-рӯза дар мавзӯи «Омодагии кӯдак ба таълим» гузашта истодааст. Ғайр аз ин, 70 омӯзгори синфҳои ибтидоӣ дар мавзӯи «Муносибати салоҳиятнокӣ ба таълим» аз курси такмили ихтисос гузаштанд.
Пайваста такмил додани сатҳи дониш ва ихтисос дар замони пешрафти техника ва инноватсия хеле муҳим аст. Донистани санадҳои меъёрию ҳуқуқӣ ва риояи онҳо, қобилияти ташкилотчигӣ ва ташаббускорӣ, худтакмилдиҳӣ ва татбиқи технологияи иттилоотӣ дар фаъолияти касбӣ ва дигар хусусиятҳои инфиродӣ, аз ҷумла аз худ кардани забонҳои хориҷӣ талаботеанд, ки иҷрои онҳо шарт ва зарур мебошад. Аз ин лиҳоз, омӯзгорон кӯшиш намуда истодаанд, бо раванди пешрафти донишҳои муосир ҳамқадам буда, талаботи хонандаро, ки қобилияти рушди босуръати зеҳнӣ дорад, қонеъ гардонда тавонанд. Аз ин рӯ, вобаста ба таҳкими пояи моддӣ-техникии муассисаҳои таълимӣ низ тадбирҳои зарурӣ андешидан зарур аст
Хубсултон ЧОРШАНБЕЕВА, омӯзгор
Баёни ақида (0) Санаи нашр: 13.08.2019 №: 155 Мутолиа карданд: 1376
