фарҳанг
ИТТИФОҚИ КОМПОЗИТОРОН ВА НАҚШИ ОН ДАР РУШДИ САНЪАТИ МУСИҚИИ КАСБӢ
Иттифоқи композиторони Тоҷикистон аввалин ташкилоти ҷамъиятии эҷодиву касбии оҳангсозон ва мусиқишиносони кишварамон мебошад, ки бо мақсади ҳифз ва рушди беҳтарин анъанаҳои мусиқии классикии халқи тоҷик ва ҷаҳонӣ, фарҳанги мусиқии касбӣ, тарбияи мутахассисони ҷавони соҳа ва фароҳам овардани шароити мусоид баҳри татбиқ намудани имкониятҳои эҷодии онҳо таъсис ёфтааст. Дар арафаи ҷашни 80 – солагии иттифоқи мазкур оид ба саҳми оҳангсозони кишвар дар рушди мусиқии касбӣ суҳбате доштем бо раиси Иттифоқи композиторони Тоҷикистон Хуршед Низомов.
- Дар асоси Қарори Шӯрои комиссарони халқи Ҷумҳурии Шӯравии Сотсиалистии Тоҷикистон аз 1 июли соли 1939 «Оид ба вазъи санъат дар ҷумҳурӣ ва чорабиниҳо вобаста ба рушди минбаъдаи он» кумитаи тадорукот ҷиҳати ташкил намудани Иттифоқи композиторон ташкил шуд. Раиси кумитаи ташкилии он композитор Александр Ленский таъйин гардид.
Иттифоқи композиторон бошад, расман 9 январи соли 1940 дар ҳайати оҳангсозон Шариф Бобокалонов, Сергей Баласанян, Александр Ленский, Самуил Урбах, Зиёдулло Шаҳидӣ, Фозил Солиев ва дигарон таъсис ёфта, аввалин раиси он Сергей Баласанян интихоб гардид. Баъдан Александр Ленский, Фазлиддин Шаҳобов, Зиёдулло Шаҳидӣ, Шарофиддин Сайфиддинов, Дамир Дӯстмуҳаммадов, Талабхӯҷа Сатторов, Аслиддин Низомов, Хайрулло Абдуллоев, Қудратулло Ҳикматов ва Шуҳрат Ашуров ба ҳайси раисони иттифоқ фаъолият намудаанд.
Аз ҷониби композиторони кишвар операву, балет, асарҳо барои оркестри симфонӣ ва созҳои миллӣ, романс, оратория, кантата, пйесаҳои зиёд барои созҳо, мусиқӣ барои кино ва асарҳои саҳнавӣ мусиқии касбӣ офарида шудааст.
Бо мақсади рушди санъати мусиқии касбӣ бо Фармони Президенти Ҷумҳурии Тоҷикистон «Дар бораи ҷоизаҳои Иттифоқи нависандагони Тоҷикистон ва Иттифоқи композиторони Тоҷикистон» аз соли 2004 Ҷоизаи ба номи Борбад дар соҳаи мусиқӣ таъсис шуд. Айни замон, дар назди Иттифоқи композиторони Тоҷикистон шӯроҳои мусиқӣ, илмӣ, идораи тарғиби мусиқии муосир, бахшҳои эҷодиву ташкилӣ, мусиқишиносӣ ва танқиди мусиқӣ, фолклору мусиқии суннатӣ ва оҳангсозӣ пурсамар фаъолият доранд. 5 нафар доктор ва 7 номзади илм, 7 барандаи Ҷоизаи давлатии Ҷумҳурии Тоҷикистон ба номи Абуабдуллоҳи Рӯдакӣ, 3 дорандаи Ҷоизаи ба номи Камоли Хуҷандӣ, 3 Ҳунарпешаи халқии Тоҷикистон ва Ҳофизи халқии Тоҷикистон, 11 Арбоби ҳунари Ҷумҳурии Тоҷикистон, 2 Корманди шоистаи Ҷумҳурии Тоҷикистон аъзои Иттифоқи композиторон мебошанд.
Аъзои иттифоқ дар баробари эҷоди асарҳои мусиқӣ ва дигар осори мусиқишиносӣ, инчунин, корҳои зиёди илмӣ - тадқиқотиро баҳри татбиқи сиёсати фарҳангии Ҳукумати Ҷумҳурии Тоҷикистон ва ниёзҳои воқеии илмӣ - амалии фарҳанг ва санъат амалӣ намуданд. Вобаста ба масоили таърихию назариявии санъати миллӣ, методологияи таҳқиқотӣ - илмӣ дар равияи санъатшиносии миллӣ пажӯҳишҳои муфид низ анҷом медиҳанд.
Мусоҳиб Лола РИЗОӢ,
«Ҷумҳурият»
Баёни ақида (0) Санаи нашр: 15.08.2019 №: 156 Мутолиа карданд: 1618
