иқтисод
«ХАТЛОН. БЕФАЪОЛИЯТИИ КОРХОНАҲО СОҲАИ САНОАТРО ҚАФО МЕКАШАД!!!»
Матлаби «Хатлон. Бефаъолиятии корхонаҳо соҳаи саноатро қафо мекашад!!!», ки 19 июни соли 2019 дар Нашрияи расмии Ҷумҳурии Тоҷикистон – рӯзномаи «Ҷумҳурият» ба нашр расидааст, дар ҷаласаи васеи назди раиси ноҳия бо иштироки муовинон, роҳбари дастгоҳ, роҳбарони ташкилоту муассисаҳои ноҳиявӣ ва масъулони соҳа мавриди таҳлилу баррасӣ қарор дода шуд.
Бо мақсади иҷрои саривақтии дастури Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати амалӣ намудани ҳадафи чоруми миллӣ – саноатикунонии босуръати кишвар, бунёди иқтидорҳои нави саноатӣ ва ба кор даровардани корхонаҳои аз фаъолият бозмонда нақшаи кории мақомоти иҷроияи маҳаллии ҳокимияти давлатии ноҳияи Мир Сайид Алии Ҳамадонӣ таҳия гардида, дар доираи он тадбирҳои муассир роҳандозӣ мешаванд.
Дар натиҷаи фаъолияти бонизоми мақомоти иҷроияи маҳаллии ҳокимияти давлатии ноҳия, роҳбарону масъулони соҳа ва сохторҳои дигари ноҳиявӣ дар муқоиса ба шашмоҳаи аввали соли гузашта ҳаҷми коркарди маҳсулоти саноатӣ, аз ҷумла намаки ошӣ 67,3, нахи пахта 86,8, равғани рустанӣ 83,1 дарсад, зиёд гардид. Истеҳсоли сангреза бошад, ба 23689,4 ҳазор метри мукааб расонда шуд, ки ин нишондиҳанда нисбат ба ҳамин давраи соли гузашта 14835,2 ҳазор метри мукааб ё 1,6 баробар зиёд аст. Дар ин муддат аз 63 корхонаи саноатӣ 26 корхона фаъолият дошт. Аз шумораи умумии корхонаҳо 7 корхона ҳаҷми истеҳсоли маҳсулотро кам намуда, 37 корхонаи дигар фаъолияти истеҳсолиро ба роҳ монда натавонист. Сабаби асосӣ дар он аст, ки ин корхонаҳо мавсимӣ буда, асосан, ба коркарди пахта машғул мебошанд ва айни ҳол аксари онҳо баъди қабули маҳсулот ба фаъолият оғоз намудаанд.
Дар маҷмӯъ, корхонаҳои саноатии ноҳия якҷо бо бахши хусусӣ дар шаш моҳи соли ҷорӣ ҳаҷми истеҳсоли маҳсулоти саноатиро ба 41 миллиону 741 ҳазор сомонӣ расондаанд ва суръати афзоиш нисбат ба ҳамин давраи соли гузашта 15,2 дарсадро ташкил медиҳад.
Мақомоти иҷроияи маҳаллии ҳокимияти давлатии ноҳия талош меварзад, ки минбаъд низ барои рушди иҷтимоию иқтисодии ноҳия, хусусан татбиқи ҳадафи чоруми стратегӣ – саноатикунонии босуръат, тадбирҳои самарабахш таҳия ва роҳандозӣ намояд.
Б. ОДИНАЗОДА, раиси ноҳияи Мир Сайид Алии Ҳамадонӣ
Баёни ақида (0) Санаи нашр: 20.09.2019 №: 180 Мутолиа карданд: 752
