туризм
КАМБУДИҲО РАФЪ МЕГАРДАНД
Посух ба матлаби «Сайёҳӣ, чаро натиҷаҳо назар ба имкониятҳо каманд?», ки 30 апрели соли 2019, № 82, дар рӯзномаи «Ҷумҳурият» нашр шудааст.
Муаллиф дар матлаб бо ёдоварӣ аз дастовардҳои сайёҳӣ аз камбудию монеаҳо низ мегӯяд ва далелҳои қавӣ дорад. Ба гуфтаи муаллиф, яке аз монеаҳои асосӣ барои ҷалби сайёҳон гаронии нархи чиптаҳои ҳавопаймо мебошад. Масалан, барои як сайёҳи амстердамӣ танҳо ҷиҳати омадурафт 1700 доллар лозим меояд, ки бо ин маблағ дар Маямии овозадор хеле хуб истироҳат кардан имконпазир аст.
Дар ҳақиқат, гаронии нархи чиптаҳои ҳавопаймо ва зиёд намудани хатсайрҳои ҳавоӣ яке аз масъалаҳои муҳими рушди сайёҳӣ ба шумор меравад. Мо ҷиҳати рушди соҳаи сайёҳӣ талош мекунем, ки ҳамкориҳоро бо ширкатҳои ҳавопаймоӣ, фурудгоҳҳо ва ширкатҳои сайёҳӣ густариш диҳем, то роҳи ҳалли масъалаи мазкур муайяну мушаххас шавад.
Айни замон, бо мақсади боз ҳам ҷолиб намудани хатсайрҳои сайёҳӣ ва паст кардани арзиши бастаҳои сайёҳӣ ҳамкориҳои самараноки байни ширкатҳои сайёҳии ватанӣ ва ширкатҳои сайёҳии кишварҳои ҳамсоя, аз ҷумла Ӯзбекистону Қирғизистон, роҳандозӣ гардида, хатсайрҳои минтақавӣ амалӣ шуда истодаанд ва қисме аз сайёҳон тавассути ин кишварҳо ба Тоҷикистон сафар мекунанд ва аз Тоҷикистон ба кишварҳои ҳамсоя мераванд.
Дар баробари ин, натиҷаҳо нишон медиҳанд, ки новобаста аз гарон будани арзиши чиптаҳои ҳавопаймо шумораи сайёҳон ба таври назаррас рӯ ба афзоиш аст. Табиист, ки масоили бунёди инфрасохтор ва қабулу пазироии сайёҳон бо шароити мусоид ба зинаи аввал мебароянд.
Ҳоло аз ҷониби кумита барои баланд бардоштани нишондиҳандаҳои соҳавӣ корҳои муайян амалӣ мешаванд. Имтиёзҳои фароҳамовардаи Ҳукумати мамлакат дар ин самт ба таври васеъ ба соҳибкорону сармоягузорони дохиливу хориҷӣ муаррифӣ гардида, 11 лоиҳаи инфрасохтории сайёҳӣ, аз ҷумла бунёди меҳмонхонаву осоишгоҳҳо, боғҳои фарҳангию фароғатӣ, роҳи танобӣ, маҷмааҳои сайёҳӣ, бо қарорҳои дахлдори Ҳукумати мамлакат аз имтиёзҳо бархӯрдор гаштанд.
Бо мақсади баромадан ба бозорҳои ҷаҳонии сайёҳӣ, кашфи бозорҳои нав ва таҳкими муносибатҳои байналмилалӣ дар соҳаи сайёҳӣ низ як қатор лоиҳаҳои созишномаҳо ва ёддоштҳои ҳамкорӣ дар соҳаи сайёҳӣ бо кишварҳои хориҷӣ таҳия гардида, созишномаҳои ҳамкорӣ бо Шоҳигарии Урдун, Федератсияи Россия, ҷумҳуриҳои Ӯзбекистону Қазоқистон ба имзо расонда шуданд.
Дар ҳамкорӣ бо Бонки ҷаҳонӣ Лоиҳаи грантӣ «Оид ба рушди иқтисодиёти деҳот» бо фарогирии рушди соҳаи сайёҳӣ ва инфрасохтори он омода гардида, дар ҷараёни татбиқи он як қатор иншооти сайёҳиву таърихӣ дар сатҳи байналмилалӣ таъмиру таҷдид карда мешаванд.
Тибқи фармоиши Ҳукумати Ҷумҳурии Тоҷикистон, корҳо барои ҷалби сармояи грантии Бонки осиёии рушд оғоз гардида, инчунин, дигар шарикони рушд барои дастгирӣ ва маблағгузории соҳаи сайёҳӣ ҷалб шуда истодаанд.
Дар баробари ин, як қатор мушкилоти соҳа дар ҳақиқат ҳанӯз мавҷуданд ва кумита барои бартараф намудани онҳо дар якҷоягӣ бо вазорату идораҳо ва мақомоти иҷроияи маҳаллии ҳокимияти давлатии шаҳру ноҳияҳо тадбирҳои заруриро роҳандозӣ намуда истодааст.
Н. АБДУҒАФФОРЗОДА, раиси Кумитаи рушди сайёҳии назди
Ҳукумати Ҷумҳурии Тоҷикистон
Баёни ақида (0) Санаи нашр: 23.09.2019 №: 181 Мутолиа карданд: 4979
