иқтисод
ХАТЛОН. 60 РӮЗИ МЕҲНАТИ ЗАРБДОР ДАР ПАХТАЗОР
Дар майдони «Қӯрғон» - и шаҳри Бохтар бо иштироки раиси вилояти Хатлон Қурбон Ҳакимзода, раисони шаҳру ноҳияҳо, роҳбарони ташкилоту муассисаҳо, намояндагони мақомоти иҷроияи ҳокимияти давлатии вилоят ва бахши кишоварзӣ даври якуми мусобиқаи меҳнатии 15 - рӯзаи ҷамъоварии ҳосили пахтаи соли равон ҷамъбаст гардид.
Тавре Носирҷон Маъмурзода, мудири шуъбаи иттилоотию таҳлилии дастгоҳи раиси вилоят, ба рӯзномаи «Ҷумҳурият» иттилоъ дод, дар мусобиқа пахтакорони ноҳияи Шаҳритуз бо таъмин намудани 44 дарсади дурнамо (ҷойи якум), шаҳри Бохтар 41,4 (ҷойи дуюм) ва шаҳри Левакант 35,5 дарсад (ҷойи сеюм) ғолиб дониста шуданд. Қурбон Ҳакимзода ба раисони ноҳияи Шаҳритуз Ҷаббори Ғаффор 15000 сомонӣ, шаҳри Бохтар Абдуалим Исмоилзода 10000 сомонӣ ва шаҳри Левакант Заррина Давлатзода 5000 сомонӣ мукофотпулӣ супурд.
Раиси вилоят гуфт, ки пахтакорӣ яке аз самтҳои асосии соҳаи кишоварзӣ ба ҳисоб рафта, рушди он барои таъмини соҳаи саноати сабук бо ашёи хом, сокинон бо ҷойи кор ва тақвияти иқтисодиёти кишвар нақши муҳим дорад.
- То кӯраки охирин чидани пахта бояд қарзи шаҳрвандии ҳар як сокини вилоят бошад. Зеро ин омил ба нишондиҳандаҳои корхонаҳои саноатии шаҳру ноҳияҳои вилоят таъсир намуда, барои ғанӣ гардондани Буҷети давлатӣ мусоидат мекунад, - гуфт Қурбон Ҳакимзода.
То 16 сентябри соли равон хоҷагиҳои пахтакори вилоят беш аз 44 ҳазор тонна пахта ҷамъоварӣ намуданд, ки 16,2 дарсади дурнаморо ташкил медиҳад.
Дар ҳамоиш барои беталаф ғундоштани ҳосили пахта «60 рӯзи меҳнати зарбдор дар пахтазор» эълон гардид. Минбаъд низ дар ҳар 15 рӯз мусобиқа ҷамъбаст гардида, ғолибони маъракаи ҷамъоварии пахта мукофотпулӣ мегиранд. Дар ҷамъбасти умумии мусобиқа, ки ба Рӯзи Президент, яъне 16 ноябр рост меояд, барандаи ҷои аввали мусобиқа соҳиби мошини сабукрав гардида, ғолибони дигар бо мукофотҳои арзишманд қадр мешаванд.
Кароматулло АТО,
«Ҷумҳурият»
Баёни ақида (0) Санаи нашр: 24.09.2019 №: 182 Мутолиа карданд: 2268
