фарҳанг
ТВ «ХАТЛОН» БА ФОРМАТИ HD МЕГУЗАРАД
Дар идораи телевизион ва радиои вилояти Хатлон бо иштироки Махфират Хидирзода, муовини раиси вилоят, оид ба натиҷаҳои фаъолияти идора дар нуҳ моҳи соли равон ҷаласаи ҷамъбастӣ доир шуд.
Дар ин бора Носирҷон Маъмурзода, мудири шуъбаи иттилоотию таҳлилии дастгоҳи раиси вилоят ба «Ҷумҳурият» иттилоъ дод.
- Ҷомеаи имрӯза барои огоҳӣ аз навигариҳои рӯз, пайдо намудани таассуроти илмию эстетикӣ нисбати олами ҳастӣ ба воситаҳои ахбори омма хеле ниёз дорад, - иброз дошт Махфират Хидирзода.
Мақсад аз сарфи маблағҳои зиёд барои фаъолияти шабакаҳои телевизион ва радиои давлатӣ ҳифз ва таъмини фазои ягонаи иттилоотии кишвар, таблиғи сиёсати иқтисодиву иҷтимоии давлат, ҳифзи арзишҳо ва музаффариятҳои давлатдории навини миллӣ мебошад.
Тавре иттилоъ дода шуд, соли ҷорӣ бо қарори раиси вилоят барои харидорӣ ва насби таҷҳизоти муосири телевизионӣ ба идораи телевизион ва радиои вилоят 750 ҳазор сомонӣ ҷудо гардида, ҳоло насби таҷҳизот бомаром идома дорад. Зикр гардид, ки аз 27 июли соли ҷорӣ пахши доимии ТВ «Хатлон» ва ТВ «Кӯлоб» дар як лифофа бо барномаҳои телевизионии «Душанбе HD», «Футбол», «ТМТ «Шаҳнавоз», «Бадахшон» тариқи моҳвораҳои AL Vah 1 ва NSS 12 оғоз гардид.
Соҳибназари Муҳамадғоиб, сардори идораи телевизион ва радиои вилоят, иброз дошт, ки аз моҳи ноябри соли равон барномаҳои телевизиони «Хатлон» бо формати пахши дақиқияташ баланд - HD ба эфир мебарояд.
Зимни ҷаласа, ҳамчунин, аз кормандони васоити ахбори оммаи вилоят даъват ба амал оварда шуд, ки ба ҳар як рӯйдоду воқеаҳои олам тавассути барномаҳои таҳлилӣ вокуниши саривақтӣ нишон диҳанд. Ҳамзамон, ба роҳбарияти идораи телевизион ва радиои вилоят дастур дода шуд, ки барои беҳтар кардани сатҳу сифати барномаҳо ва баланд бардоштани дараҷаи касбияти кормандони эҷодиву техникӣ тадбирҳои зарурӣ андешида шавад.
Кароматулло АТО,
«Ҷумҳурият»
Баёни ақида (0) Санаи нашр: 17.10.2019 №: 195 Мутолиа карданд: 2341
