туризм
ИШКОШИМИ ПУРАСРОР
Дар ҳафт ҷамоату чилу ҳашт деҳаи Ишкошим зиёда аз сиву чор ҳазор сокин зиндагӣ мекунад. Касбу кори асосии мардум деҳқониву чорводорӣ мебошад. Инчунин, ҳунармандиву косибӣ, дуредгариву чӯбтарошию наққошӣ, ресандагиву дӯзандагӣ, ҷуроббофию муҳракашӣ, чакманбофию сангтароширо идома дода, анъанаҳои неки гузаштагони худро пос медоранд.
Овозаи дасти пурэъҷози ҳунармандони ишкошимӣ дар хориҷи кишвар ҳам паҳн гашта, ба маҳсули дасти онҳо амрикоиҳову англисҳо, олмониҳою чиниҳо мароқи бештар зоҳир менамоянд.
103 ёдгории таърихию фарҳангӣ сарвати бебаҳои маънавии мардуми ноҳия ба ҳисоб меравад. Аз ҷумла, қалъаҳои Абрешим, Ямчун, Қаҳ – қаҳа, Кофарқалъа ва Чилтан таваҷҷуҳи ҳар бинандаро ба худ мекашад. Ҳамчунин, ёдгориҳои таърихии деҳаи Ширгин, ба мисли Санги аждаҳо ва оромгоҳҳои Хоҷақамбару Шоҳбурон бо таърихи пурасрорашон барои ҷалби сайёҳон мусоидат менамоянд.
Ишкошим табиати афсункор дорад. Обу ҳавои форам, махсусан чашмаҳои шифобахши он, писанди меҳмонони дохилию хориҷист. Чашмаҳои шифобахши деҳоти Гармчашма, Сист, Авҷ, Удит, Даршай, Вранг, Ширгин, Зонг дармонбахши ҳазорҳо дард ва макони истироҳату фароғатанд.
Ин мавзеъ бо ганҷҳои зеризаминӣ: лаъл, ангишт, тиллою нуқра, лоҷуварду симобу уран ва ғайраҳо низ машҳур аст. Аммо то ҳол ин сарватҳо мавриди таҳқиқу пажӯҳиши ҳамаҷониба қарор нагирифтаанд.
Хусусияти шифобахшии гиёҳҳояшро табиби маъруфи кишвар Ширинбек Давлатмамадов ба таври возеҳу равшан шарҳ додааст, ки аз рӯи он дар осоишгоҳҳои Бибӣ Фотимаи Заҳрою Гармчашма ва Авҷ маризонро табобат мекунанд.
Алифшо ШОАЛИФЗОДА, собиқадори маорифи халқи ноҳияи Ишкошим
Баёни ақида (0) Санаи нашр: 21.10.2019 №: 197 Мутолиа карданд: 4083
