ҳуқуқ
КОНСТИТУТСИЯ САРМАНШАИ АДОЛАТИ СУДӢ
Рушди иқтисодиву иҷтимоии давлат дар ҳама давраҳои таърихӣ аз таъмини адолати иҷтимоӣ, риояи ҳуқуқу озодиҳои инсон ва шаҳрванд маншаъ мегирад. Дар саргаҳи иҷрои ин амр нақши мақомоти судӣ ҳамчун шохаи мустақили ҳокимияти давлатӣ баланд мебошад. Ин аст, ки Конститутсияи Ҷумҳурии Тоҷикистон ба сифати санади олии ҳуқуқӣ риоя ва ҳифзи ҳуқуқу озодиҳои инсонро тавассути фаъолияти мақомоти судӣ кафолат додаст.
Ин нуктаро Мавлуда Қаландарзода, раиси Суди Олии иқтисодӣ, зимни мизи мудаввар бахшида ба 25 - умин солгарди Конститутсияи Ҷумҳурии Тоҷикистон ва Рӯзи кормандони мақомоти судӣ доир ба мавзӯи «Нақши Конститутсияи Ҷумҳурии Тоҷикистон дар таҳкими судҳои иқтисодӣ» зикр намуд.
Ба гуфтаи ӯ, дар зарфи 25 сол Конститутсияи мамлакат барои эҳтиром, риоя, ҳифзи ҳуқуқу озодиҳои инсон ва шаҳрванд, таъмини шароити хуби зиндагӣ барои ҳар шахс фазои мусоиди ҳуқуқӣ ба вуҷуд оварда, аз ҷониби коршиносони байналмилалӣ яке аз беҳтарин конститутсияҳо дониста шуд. Маҳз ин санади олии ҳуқуқӣ дар Тоҷикистон барои эъмори ҷомеаи шаҳрвандӣ заминаи устувори ҳуқуқӣ гузошта, механизми ҳамкории мақомоти давлатиро бо ниҳоди ҷомеаи шаҳрвандӣ муайян намуд.
Инчунин, зимни ҷамъомад, собиқадорони соҳа, раисони судҳои олии иқтисодии вилоятҳо ва як қатор шаҳру ноҳияҳо нақши Конститутсияро дар таҳкими судҳои иқтисодӣ баланд арзёбӣ карданд. Зикр шуд, ки Конститутсия ба ислоҳоти судӣ дар мамлакат замина гузошт, ҳокимияти судӣ рукни мустақили ҳокимияти давлатӣ эътироф гардид ва дар ин замина, бори нахуст дар кишвар Суди конститутсионӣ, судҳои иқтисодӣ ва ҳарбӣ таъсис ёфтанд.
Бо мақсади таҳкими минбаъдаи ҳокимияти судӣ, содагардонии ҷараёни мурофиаи судӣ, баланд бардоштани нақши суд дар ҳифзи ҳуқуқу озодиҳои инсону шаҳрванд, таъмини қонунияту адолат, ҳимояи манфиатҳои давлат ва такмили сохтору фаъолияти мақомоти судӣ дар кишвар чор барномаи ислоҳоти судӣ - ҳуқуқӣ қабул ва татбиқ гардид.
Чорабиниҳое, ки дар барномаҳои мазкур пешбинӣ шуданд, боз ҳам тақвият бахшидани кафолати конститутсионии адолати судӣ барои ҳифзи ҳуқуқу озодиҳои инсон ва шаҳрванд ба шумор меравад, ки онро қисми 3 моддаи 5 Конститутсияи Ҷумҳурии Тоҷикистон муайян намудааст.
Кароматулло АТО,
«Ҷумҳурият»
Баёни ақида (0) Санаи нашр: 31.10.2019 №: 205 Мутолиа карданд: 1690
