ҳуқуқ
КОНСТИТУТСИЯ. САНАДЕ, КИ КАФИЛИ ЗИНДАГИИ ОСОИШТА АСТ
Мусаллам аст, ки ҳар як давлат қонуни асосӣ - конститутсияи худро дорад. Маҳз бо ба даст овардани Истиқлолияти давлатӣ ва бо талошҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон конситутсияи ҳақиқии ба меъёрҳои байналмилалӣ ҷавобгӯ ва ифодакунандаи орзую армони халқи тоҷик 6 ноябри соли 1994 аз тариқи райъпурсӣ қабул гардид.
Конститутсияи Ҷумҳурии Тоҷикистон аз 10 боб ва 100 модда иборат буда, дар он масъалаҳои асосии ҳокимияти давлатӣ, асосҳои сохтори иқтисодию иҷтимоии ҷамъият, вазъи ҳуқуқии инсон ва шаҳрванд, сохтори давлатӣ, инчунин, дигар масъалаҳои муҳими давлатӣ ва ҷамъиятӣ инъикос гаридаанд.
Боби нуҳуми конститутсия ба мақомоти прокуратура бахшида шудааст. Кормандони ин ниҳоди давлатӣ аз ғамхориҳои ҳамарӯзаи Пешвои миллат оид ба татбиқ намудани тадбирҳо аз ҷониби Ҳукумати Ҷумҳурии Тоҷикистон вобаста ба таъмини фаъолияти самарабахши ин мақомоти давлатӣ рӯҳбаланд гардида, пайваста кӯшиш доранд ваколати худро доир ба амалӣ кардани назорати риояи дақиқ ва иҷрои якхелаи қонунҳоро дар сатҳи баланд ба роҳ монанд.
Имрӯзҳо бахшида ба пешвози Рӯзи қабули конститутсия дар ташкилоту корхона ва ҷамоату муассисаҳои таълимӣ, қисмҳои ҳарбӣ ба аҳолии Вилояти Мухтори Кӯҳистони Бадахшон вохӯриву мулоқот доир гардида, моҳият ва талаботи меъёрҳои қонуни асосӣ бо мисолҳои возеҳ, дар як вақт заҳматҳои Пешвои миллат муҳтарам Эмомалӣ Раҳмон баҳри ободу осудагӣ ва ҳифзи ҳуқуқу озодиҳои инсон ва шаҳрванд, ҳимояи якпорчагии кишвари азизамон фаҳмонда мешавад.
Моро лозим аст, ки аз як гиребон сар бароварда, дастуру ҳидоятҳои Сарвари давлатро бобати бунёди ҷомеаи адолатпарвар бо сари баланд иҷро намуда, шароити зиндагии арзанда ва инкишофи озодонаро фароҳам оварда, ҳамарӯза талаботи меъёрҳои конститутсияро бе нуқсон риоя намоем.
Сорбон АБДУЛЛОЗОДА, ёрдамчии прокурори ҳарбии гарнизони Хоруғ
Баёни ақида (0) Санаи нашр: 04.11.2019 №: 207 Мутолиа карданд: 1408