иқтисод
ДАНҒАРА. ИСТЕҲСОЛИ ПАХТА БА 10 ҲАЗОР ТОННА МЕРАСАД
Пахта ҳамчун ашёи хоми саноатӣ барои фаъолияти босамари корхонаҳои коркарди пунба, ресандагию бофандагӣ заминаи мусоид фароҳам меорад. Ба хотири аз лиҳози иқтисодӣ манфиатовар будани соҳа, майдони кишти ин зироати саноатӣ сол ба сол дар кишвар зиёд мешавад. Тараққӣ додани пахтакорӣ имкон фароҳам меорад, ки мардум бо ҷойҳои кор таъмин гардида, даромади худро афзун намояд.
Имсол дар мавсими пахтачинӣ дар шаҳру ноҳияҳои пахтакори вилояти Хатлон 60 рӯзи меҳнати зарбдор эълон шудааст. Натиҷаҳои ҷамъоварии ҳосили пахта дар минтақа давоми ҳар 15 рӯз ҷамъбаст гардида, ба ғолибон туҳфаҳои пулию хотиравӣ супурда мешаванд.
Дар ҷамъбасти давраи сеюми мусобиқа ноҳияи Данғара бо натиҷаҳои баланди кори пахтакоронаш ҷои аввалро соҳиб гардид. Туҳфаҳои пуливу хотиравиро Сарвазири мамлакат Қоҳир Расулзода ва раиси вилоят Қурбон Ҳакимзода ба раиси ноҳия Исломиддин Раҳмон супурданд.
Заркорони заҳматпешаи ноҳия то имрӯз беш аз 9324 тонна ҳосили пахта рӯёнда, ба нуқтаҳои қабул супурданд, ки 112 дарсади нақшаро ташкил медиҳад. Самари бадастомада назар ба ҳамин давраи соли гузашта 2 ҳазору 848 тонна зиёд мебошад. Дар ин дастоварди баланди меҳнатӣ саҳми хоҷагиҳои деҳқонӣ ва кооперативҳои истеҳсолии «Раҳмонҷон», «Муҳсинҷон», «Исматиён», «Навобод», «Муҳаммад», «Сомон» «Асадулло», ҷамоатҳои деҳоти Лолазор, Корез, Оқсу, Исмат Шарифов, Сангтӯда хеле назаррас мебошад.
Ҳоло дар қитъаҳои пахтаи диёр 195 хоҷагии пахтакор ва 4,5 ҳазор чинакчӣ баҳри иҷрои уҳдадориҳо талош доранд. Чинакчиён барои чидани як кило пахта 50 - 60 дирам ҳаққи меҳнат мегиранд. Рӯзе 250 - 300 тонна пахтаи хушсифат ҷамъоварӣ мешавад. То имрӯз ҳосили зиёда аз 3 ҳазор гектар замини пахта ба воситаи мошинҳои пахтачинӣ ҷамъоварӣ шуда, барои тайёр кардани ришта ба корхонаи «Ҷунтай Данғара Син Силу Текстил» супурда шуд.
Сари вақт таъмин намудани кишоварзон бо оби полизӣ яке аз омилҳои асосии иҷрои дурнамои пахта аст. Бо кӯшишу заҳмати роҳбарияти ноҳия ин масъала аллакай ҳалли худро ёфт. Пахтакорон имсол аз об танқисӣ накашиданд. Идораи беҳдошти замин ва обёрии ноҳия бо роҳбарии Абдулло Муқимов аз аввали мавсим то фарорасии рӯзҳои ҷамъоварии ҳосили пахта обро аз Муассисаи давлатии «Нақби оби Себистон» қабул карда, ба воситаи каналҳо, заҳбуру заҳкашҳо пахтакоронро бо об таъмин намуданд.
Сарфи назар аз иҷрои барзиёди дурнамои ҷамъоварии пахта дар замини хоҷагиҳои пахтакор ғундоштани ҳосили боқимонда бомаром ҷараён дорад. Пахтакорони заҳматпешаи ноҳия дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро барои оқилона истифода бурдани замин сармашқи кор қарор дода, дар ин роҳ қадамҳои устувору натиҷабахш гузошта истодаанд. Масъулон даромади соҳаро ба назар гирифта, имсол ҳаҷми заминҳои пахтазорро 370 гектар зиёд намуданд. Айни замон дар саҳро ҳосил фаровон аст. Пахтакорони зафарманди ноҳия аз рӯзҳои офтобӣ самаранок истифоа бурда, азм доранд, ки пахтаи бо арақи ҷабин парваридаи худро ҷамъоварӣ намуда, истеҳсоли онро ба 10 ҳазор тонна расонанд.
Холназар КАСИРОВ, «Ҷумҳурият»
Баёни ақида (0) Санаи нашр: 12.11.2019 №: 212 Мутолиа карданд: 953
