маориф
ХУҶАНД. ЯК ҲАМОИШИ МУҲИМИ ИЛМӢ
Дар раёсати Донишгоҳи давлатии Хуҷанд ба номи академик Бобоҷон Ғафуров дар доираи ҳадафи чоруми миллӣ эълон гардидани саноатикунонии босуръат конфронси илмию амалӣ таҳти унвони “Саноатикунонии босуръат: таърих ва замони муосир” бо иштироки доираи васеи олимону мутахассисони соҳаи иқтисодиёти мамлакат ва роҳбарияти вилояти Суғд доир гардид.
Хайрулло Сабуров, муовини ректор оид ба илму инноватсия, профессор, гуфт, ки мақсад аз ташкили конфронс дарёфти мулоҳизаю хулосаҳои судманд бо ҷалби олимону муҳаққиқони пажӯҳишгоҳҳои ватанию хориҷӣ ва муассисаҳои таҳсилоти олии касбии ҷумҳурӣ ҷиҳати ноил шудан ба ҳадафҳои Стратегияи миллии рушд, пешрафти устувори иқтисодиву инкишофи неруи инсонӣ ва баланд бардоштани сатҳу сифати зиндагии мардуми кишвар мебошад. Иштирокдорони чорабинӣ аҳамияти иқдоми Сарвари давлат муҳтарам Эмомалӣ Раҳмонро барои роҳандозии саноатикунонии босуръат хуб дарк намуданд, ки дар заминаи он боз чанд ташаббуси созанда пеш гирифта мешавад.
Анвар Яъқубӣ, муовини раиси вилояти Суғд, зикр намуд, ки эълон гардидани саноатикунонии босуръати кишвар ҳамчун ҳадафи чоруми миллӣ ба тарҳрезии барномаҳои соҳавии кишвар замина мегузорад. Дар ин ҷода истифодаи неруи зеҳнии олимон, муҳаққиқону коршиносон барои ворид шудан ба сафи кишварҳои саноатӣ, мувофиқи мақсад аст. Ин ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои фароҳам овардани шароити шоистаи зиндагии ҳар як шаҳрванд ва ободу зебо намудани Тоҷикистони азиз саҳми босазо мегузорад.
Дар конфронс як қатор олимони барҷаста, аз ҷумла Абдураҳмон Қодиров, устоди Донишгоҳи давлатии Хуҷанд, доктори илмҳои иқтисодӣ, профессор, оид ба мавзӯи “Ҳадафҳои стратегии иқтисодии Тоҷикистон дар Паёми Пешвои миллат”, Абдулатиф Раҳимов, устоди Донишгоҳи давлатии ҳуқуқ, бизнес ва сиёсати Тоҷикистон, доктори илмҳои иқтисодӣ, профессор, дар мавзӯи “Саноатикунонии босуръати кишвар ҳадафи чоруми стратегии миллии Ҷумҳурии Тоҷикистон” ва Абдумавлон Азимов, устоди Донишгоҳи давлатии тиҷорати Тоҷикистон, доктори илмҳои иқтисодӣ, профессор оид ба “Мавқеи саноатикунонии мамлакат дар рушди босуботи кишвар” маърузаҳои пурмуҳтаво намуданд.
Ҳамчунин, доир ба масоили таъмини бозорҳои дохилӣ бо молҳои саноатӣ, роҳандозии технологияҳои нав, афзоиши рақобат байни корхонаҳои истеҳсолию саноатӣ, фурӯши маҳсулоти он, беҳтар намудани сифати молҳои истеҳсолшуда, таҳаввулоти сохторӣ дар бозорҳои ҷаҳонӣ ва ҷанбаҳои дигари соҳа табодули афкор намуданд.
Алишер РАҲМОНӢ, котиби маркази иттилоот ва таҳлилии ДДХ ба номи академик Бобоҷон Ғафуров
Баёни ақида (0) Санаи нашр: 12.11.2019 №: 212 Мутолиа карданд: 2691
