фарҳанг
МУСИҚӢ САРҲАД НАДОРАД
Консерти калони мусиқии анъанавӣ, ки дар доираи Фестивали байналмилалии «Шарқ- Ғарб: анъанаҳои мусиқӣ ва ҳунарҳои мардумии АвруОсиё дар фазои фарҳангии Иттиҳоди Давлатҳои Мустақил» таҳия гардида буд, дар толори «Арғунун» - и Донишкадаи давлатии фарҳанг ва санъати Тоҷикистон ба номи Мирзо Турсунзода баргузор гардид.
Дар навбати аввал бо иҷрои сурудҳои «Дугоҳ», «Танавор», «Омонёр» ҳунарпешаи халқии Ҷумҳурии Ӯзбекистон Замира Суюнова бо ансамбли давлатии «Шашмақом» - и Кумитаи телевизион ва радиои назди Ҳукумати Ҷумҳурии Тоҷикистон ба номи Фазлиддин Шаҳобов ҳунарнамоӣ намуд. Намояндаи Ҷумҳурии Қазоқистон Бабижан Баглан бо сурудҳои халқии «Келқайнарға», «Аккум» ва суруди Кенен Азербаев «Басты олен» рӯи саҳна омад. Намоянда аз Ҷумҳурии Қирғизистон, ғолиби озмунҳои байналмилалӣ Рисбек Жунушев бо сози қомус оҳангҳои А. Огонбаев «Ак тамак кук тамак», «Маш ботой», оҳанги И. Туманов «Кенеш» - ро ба иҷро расонд.
Ғолиби озмунҳои байналмилалӣ аз Федератсияи Россия Александр Прасолов оҳангҳои «Вы послушайте ребята», «Ай все кумушки домой», суруди шӯхи «Заиграй моя волынка» ва сурудҳои қадимаи «Я встретил Вас», «Ехал казак за Дунай», «Ах ты, берёза» - ро манзури ҳозирон гардонд.
Абдувалӣ Абдурашидов, ҳунарпешаи халқии Тоҷикистон, бо навозиши «Навои танбӯр», Озода Ашӯрова, ҳунарпешаи халқии Тоҷикистон бо «Сарахбори ороми ҷон» бар ғазали Ҳофиз, Хушбахт Ниёзов бо навозиши «Навои рубоб», Шоҳин Абдуллоев «Фалак» дар оҳанги халқ, «Чӣ ёд дорам» шеъри Ҷалолуддини Балхӣ дар иҷрои Раҳматулло ва Фирдавс Ҳошимовҳо (дар рақс ансамбли «Бунафша» - и ДДФСТ ба номи Мирзо Турсунзода) мусиқии анъанавии тоҷикиро ба иштирокчиёни фестивали байналмилалӣ пешниҳод намуданд.
Аҳли толор суруду оҳангҳои баиҷрорасондаи ҳунармандонро бо кафкӯбиҳои самимии бардавом қабул карданд. Ин гувоҳи он аст, ки «Мусиқӣ сарҳад надорад».
Бобоҷон РАҲИМОВ, мудири бахши сифати таҳсилоти ДДФСТ
ба номи Мирзо Турсунзода
Баёни ақида (0) Санаи нашр: 14.11.2019 №: 214 Мутолиа карданд: 801
