фарҳанг
ТОҶИКИСТОН - ХОНАИ УМЕДИ ФОРСИЗАБОНОН
Чашм ба шабака медӯзам ва гӯш медиҳам ба суханони пуралами афғонҳо ва эрониёни муҳоҷир. Эшон бо дили пурдард ва дар ҳасрати Афғонистони ҷангзадаю Эрони бостон ҳарф мезананд ва дар симои Тоҷикистон ватани гумкардаи худро мебинанд.
Аз ҳама хуштар он аст, ки тамоми донишмандони муҳоҷири афғону эронӣ ба Асосгузори сулҳу ваҳдати миллӣ - Пешвои миллат, Президенти Тоҷикистон муҳтарам Эмомалӣ Раҳмон меҳри махсус доранд ва эшонро меросбари Куруши Кабир ва Исмоили Сомонӣ эътироф кардаанд. Байни халқ масале ҳаст: «То мусофир нашавӣ, мусалмон намешавӣ»… Вақто ки дили афғону эронии муҳоҷир ба хотири меҳанашон гум мезанад, меоянд ба Тоҷикистон ва баъди бозгашт дар ақсои олам Тоҷикистонро чун ватани фарҳанги ориёӣ ва Пешвои миллатро чун посдор ва пуштибони фарҳанги ориёӣ ситоиш менамоянд. Бале, барҳақ Тоҷикистон имрӯз пушту паноҳи форсизабонони дунёст.
Баъзан хонандагон суол медиҳанд, ки бузургии Пешвои миллат дар чист? Посух медиҳам, ки дар бахшояндагиашон. Чандин маротиба ба қонунҳои авф имзо карданд, гуноҳи ҷинояткоронро бахшиданд. Мо дар замони шӯравӣ бисёр чизҳоро аз даст додем. Садди роҳи бунёди "Роғун" шудем, дар Кӯлоб заводи аккумулятор насохтем, оби Мастчоҳ ба Истаравшан бурда нашуд, нақби Анзоб носохта монд… Дилу нияти холиси Пешвои миллат боиси он гардиданд, ки мо "Роғун" - ро сохта истодаем ва бо «нохун» нақби Анзобро кандем. Тоҷикистон рӯз ба рӯз ва соат ба соат обод мешавад.
Моро як чиз ба андеша мегузорад: онҳое, ки заҳри беватанӣ чашидаанд, дар симои Тоҷикистон Ватан мебинанд ва беватанони Тоҷикистон дар орзуи вайронии онанд…
Дӯсту рафиқонам аз гӯшаю канорҳо меоянд ва ба он қоил мешаванд, ки дар тамоми гӯшаи Тоҷикистон навигарие мебинанду ободониҳо чашмрасанд. Ҳоло агар ба деҳоти Панҷакент сафар кунед, мебинед, ки деҳаҳо то рафт обод мешаванд ва аз он хонаҳои лоину гилин нишоне нест. Роҳҳо обод.
Ободонию созандагию бунёдкориҳои Пешвои миллатро мардум дастгирӣ мекунанд. Яке пул месозад, дигаре роҳ, сеюмӣ корхонаю мактаб. Созандагӣ дар хуни тоҷик ҷой гирифтааст. Ҳатто замони пеш Эшназару Саидмуроду Сафарбой дар Некнот, Қосимбойи Завронӣ дар заминҳои санглох боғ бунёд карда буданд. Шаҳобиддин чойхона ва Эвазмоҳ истгоҳи автобус сохтанд. Созандагию бунёдкорӣ дар табиати мардуми мо нуҳуфтааст ва Пешвои миллат тавонистанд ҳисси ватансозии мардумро бедор кунанд. Мо Тоҷикистонро обод менамоем, то ки хонаи умеди тоҷикон ва форсизабонони дунё Ваҳдатобод, Сулҳобод ва Оштиобод бошад.
Холмурод САФАРЗОДА, рӯзноманигор, шаҳри Панҷакент
Баёни ақида (0) Санаи нашр: 15.11.2019 №: 215 Мутолиа карданд: 1202
