фарҳанг
ИҚДОМИ ХУБИ ҲОШИМ ГАДО
Ҳадя намудани китобҳои тозанашри худро ба Донишкадаи давлатии фарҳанг ва санъати Тоҷикистон ба номи Мирзо Турсунзода ҳунарвари нотакрори тоҷик Ҳошим Гадо ба анъана табдил додааст. Танҳо дар соли хониши 2018 – 2019 аз ҷониби ин ҳунарманд ба китобхонаи илмии донишкада беш аз 2 ҳазор нусха китоб тақдим гардид.
Ёдовар мешавем, ки Ҳунарпешаи халқии ИҶШС, Ҳунарпешаи халқии Тоҷикистон, барандаи Ҷоизаи давлатии Тоҷикистон ба номи Абуабдуллоҳи Рӯдакӣ ва Ҷоизаи давлатии ИҶШС, Арбоби ҳунари Тоҷикистон, дорандаи ордени Ситораи Президенти Ҷумҳурии Тоҷикистон Ҳошим Гадо наздик ба 60 сол аст, ки дар рушду нумӯи санъати тоҷик, офаридани нақшҳои барҷаставу хотирмон дар саҳнаҳои театр ва кино саҳми зиёд гирифта, на танҳо дар кишвар, балки дар араси байналмилалӣ низ ҳамчун ҳунарманди камназиру нотакрор муаррифӣ гардида, мавқеи хосро дорад. Аз ҷумла, соли 1999 ба ифтихори 1100 – солагии Давлати Сомониён, ки ба ҷашни бузурги умумимиллӣ табдил ёфт, дар варзишгоҳи марказии шаҳри Душанбе нақши шоҳ Исмоили Сомониро бозида, соли 2008 ба шарафи 1150 – солагии сардафтари адабиёти классикии тоҷику форс Абуабдуллоҳи Рӯдакӣ аз рӯи асари устод Сотим Улуғзода намоишномаи «Рӯдакӣ» - ро ба саҳна гузошт. Ҳошим Гадо аз соли 1996 то инҷониб дар Донишкадаи давлатии фарҳанг ва санъати Тоҷикистон ба номи Мирзо Турсунзода фаъолият дорад. Ҳоло дар ин боргоҳи ҳунару санъат ба ҳайси профессор – консултант ифои вазифа намуда, ҳамзамон, ба донишҷӯён аз фанни маҳорати актёрӣ дарс медиҳад.
Ин ҳунарпеша муаллифи беш аз 240 ҷилд китоб мебошад.
Додоҷон РӮЗИЕВ, рӯзноманигор
Баёни ақида (0) Санаи нашр: 18.11.2019 №: 216 Мутолиа карданд: 847
