ҳуқуқ
"ЧАРО ҲОҶӢ ҚАРОРИ СУДРО ИҶРО НАМЕКУНАД?"
Суди Олии Ҷумҳурии Тоҷикистон матлаби «Чаро ҳоҷӣ қарори судро иҷро намекунад?», ки дар рӯзномаи «Ҷумҳурият» аз 18 сентябри соли 2019, № 179, нашр гардидааст, мавриди омӯзиш қарор дод.
Муайян шуд, ки бо ҳалномаи суди ноҳияи Рӯдакӣ аз 10 майи соли 2017 даъвои Сафар Сафаров қисман қонеъ шуда, аз ҳисоби ҷавобгарон Хайриниссо Гулаева ва Маҳмадқул Гулаев ба фоидаи С. Сафаров зарари моддӣ дар ҳаҷми 24 704 сомонӣ, зарари маънавӣ ба маблағи 300 сомонӣ ва 150 сомонӣ хароҷоти судӣ рӯёнда шудааст.
Бо қарори коллегияи судӣ оид ба парвандаҳои граждании Суди Олӣ аз 27 сентябри соли 2017 шикояти кассатсионии ҷавобгар М. Гулаев рад ва ҳалномаи суди марҳилаи якум бетағйир мондааст. Айни замон, ҳалномаи мазкур эътибори қонунӣ дошта, варақаҳои иҷроро 5 октябри ҳамон сол тибқи дастхат ба ситонанда Сафар Сафаров супурдаанд.
Муаллифи мақола аз он норозигӣ баён намудааст, ки чаро Мамадқул Гулаев қарори судро иҷро намекунад?. Дар ин робита бояд гуфт, ки иҷрои маҷбурии санадҳои судӣ тибқи муқаррароти моддаи 4 Қонуни Ҷумҳурии Тоҷикистон «Дар бораи истеҳсолоти иҷро» ба зиммаи иҷрочиёни Хадамоти иҷрои назди Ҳукумати Ҷумҳурии Тоҷикистон гузошта шудааст. Аз ин лиҳоз, номбурда ҳуқуқ дорад иҷрои саривақтии ҳалномаи судро аз иҷрочиёни Хадамоти иҷрои назди Ҳукумати Ҷумҳурии Тоҷикистон талаб намояд.
Дар баробари ин, аз ҷониби шахсони масъули Суди Олӣ ба суди ноҳияи Рӯдакӣ вобаста ба бурдани назорати доимӣ ҷиҳати иҷрои ҳалномаи дар боло зикргардида дастурҳои зарурӣ дода шуданд.
Ш. ЛУТФУЛЛОЗОДА, муовини якуми раиси Суди Олӣ
Баёни ақида (0) Санаи нашр: 19.11.2019 №: 217 Мутолиа карданд: 1318
