ҳуқуқ
ҶИНОЯТ ва ҶАЗО
ОДАМКУШӢ
Қотил 22 сол паси панҷара рафт
Муноқишаи як оила дар ноҳияи Вахш, ки бидуни никоҳи расмӣ зиндагӣ мекарданд, бо куштори ҳамсар анҷом шуд.
Бино ба иттилои маркази матбуоти Прокуратураи генералии Ҷумҳурии Тоҷикистон, ин ҳодиса моҳи марти соли равон рух дод. Олимҷон Алимов ҳамсараш С. Назароваро бо роҳи буғӣ ва зарби корд дар манзили истиқоматиаш ба ҳалокат расондааст. Сипас, бо мақсади пинҳон намудани ҷинояти содиркардааш фарши яке аз ҳуҷраҳои манзили истиқоматиашро канда ҷасади ҳамсарашро онҷо зери хок мекунад.
Аз рӯи ин ҳолат прокурори вилояти Хатлон бо моддаи 104 қисми 2 банди «д» (Одамкушӣ. Куштани зане, ки ҳомилагии ӯ барои гунаҳгор аён аст) - Кодекси ҷиноятӣ парвандаи ҷиноятӣ оғоз намуда, бо ҳукми суди вилоят О. Алимов 22 сол равонаи зиндон шуд.
ДУВОЗДАҲ СОЛИ ЗИНДОН
барои кӯшиши интиқоли ғайриқонунии маводи мухаддир
Суди Вилояти Мухтори Кӯҳистони Бадахшон Гулзорхон Додихудоев - сокини ноҳияи Шуғнонро дар муомилоти ғайриқонунии воситаҳои нашъадор ва контрабанда гунаҳгор дониста, ӯро ба 12 соли зиндон бо адои ҷазо дар муассисаи ислоҳии низомаш сахт маҳкум кард.
Тавре маркази матбуоти Прокуратураи генералӣ дар ин бора хабар дод, Г. Додихудоев дар дидбонгоҳи муваққатии ШБДА дар деҳаи Рӯзвайи ноҳияи Дарвоз аз тарафи кормандони ШВКД – и ноҳияи мазкур ҳангоми кӯшиши интиқоли маводи нашъаовар дастгир шудааст. Ин дар ҳолест, маҳкумшуда қаблан низ бо содир намудани ҷинояти моддаи 200 қисми 4 банди «д» - и Кодекси ҷиноятӣ (муомилоти ғайриқонунии воситаҳои нашъадор) суд шудааст.
Номбурда маводи нашъаовари навъи ҳашишро дар ҳаҷми 1 килограмму 50 грамм аз Муҳаммадвалӣ ном шаҳрванди Ҷумҳурии Исломии Афғонистон дар шаҳри Хоруғ гирифта, қасд дошт, ба шаҳри Душанбе интиқол диҳад.
ҚАЛЛОБӢ
Амали фиребкоронаи
хонахарон тафтиш мешавад
Кормандони милитсия ба тафтиши ҳодисае шурӯъ кардаанд, ки гумон меравад дар он ду нафар - марди 20 ва 31 - сола дар содир намудани ҷиноятӣ қаллобӣ даст дошта бошанд.
Ба иттилои сомонаи ВКД, тафтишот дар заминаи шикояти як сокини ноҳияи Рӯдакӣ ба ШВКД - 1 ноҳия оғоз гардидааст. Муроҷиаткунанда, ки аз ӯ зани 54 - сола ном бурда мешавад дар аризааш ба мақомоти корҳои дохилӣ арз кардааст, ки нафарони зикршуда моҳи апрели соли ҷорӣ бо роҳи фиреб ба бовариаш даромада, аз ӯ хонаи истиқоматиаш, воқеъ дар Ҷамоати деҳоти Сомониёнро ба маблағи 190 000 сомонӣ гирифта, то ҳол маблағашро надодаанд.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 19.11.2019 №: 217 Мутолиа карданд: 1419
