номаҳо
ДАР ИСЛОҲИ ИМЛО БЕТАРАФ НАБОШЕМ!
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имсол ба муносибати Рӯзи забони давлатӣ бо аҳли зиё вохӯрӣ доир намуда, тағйир, ислоҳ ва бамеъёрдарории «Қоидаҳои имлои забони тоҷикӣ» - ро дастур доданд.
Аз ҷумла, таъкид шуд: «Камбудиву духӯрагиҳои ҷиддие, ки дар қоидаҳои имлои забони тоҷикӣ ба назар мерасанд, ислоҳ шаванд. Зеро вазъи номуайяни қоидаҳои имлои забони тоҷикӣ ва возеҳу равшан набудани бисёр бандҳои он боиси баҳсу мунозираҳои нолозим шуда, ба сатҳи саводнокии мардум, махсусан насли наврасу ҷавон, таъсири манфӣ расонда истодааст».
Аз ин рӯ, ҳоло ниҳодҳои дахлдор дар ин хусус тадбирҳои заруриро андешида истодаанд. Пешвои миллат муҳлатро то моҳи январи соли 2020 муайян кардаанд.
Мутахассисони соҳа шаҳрвандонеро, ки дар илми забоншиносӣ фаҳмишу дарк доранд, барои танзими имло ҷалб мекунанд. Бахусус, омӯзгорон бояд дар ин масъала бетараф набошанд. Мо медонем, ки бештари муаллимон дар ҷараёни таълиму тарбия нозуктарин паҳлуҳои имлоро ҳис мекунанд. Ғалатҳоро мефаҳманд, зеро таҷриба ва назария бартариҳои бисёр дорад. Аз ин хотир, дар пешгирии нофаҳмиҳо ва сардаргумиҳо дар имло андешаҳои худро ба унвони Кумитаи забон ва истилоҳоти назди Ҳукумати ҷумҳурӣ агар ирсол намоянд, ба манфиати кор мебуд.
Зеро имло танзимкунандаи шакли хаттии забони адабӣ буда, меъёри асосии муайянкунандаи тарзи навишти калимаҳост ва дар асоси он талаффузи калимаҳо сурат мегирад. Дар ин ҳол нақши имло ҳамчун муҳофизатгари забон калидист. Ғалате, ки дар навиштор роиҷ мешавад, ҳатман дер ё зуд ба гуфтор раҳ меёбад ва косташавии забонро ба вуҷуд меорад.
Сарвари давлат бо дурандешӣ ба татбиқ ва робитаи амалии забон дар технологияи муосир ибрози андеша намуда таъкид доштанд: «Таъсири манфии ихтилофи баъзе бандҳои қоидаҳои имлои забони тоҷикӣ, ки муайянкунандаи шакли хаттии забон мебошанд, дар таҳияи барномаи компютерии «Санҷиши дурустнависии калимаҳои тоҷикӣ» ба мушоҳида мерасад ва ин мушкилот то имрӯз ҳаллу фасл нашудааст».
Мо, омӯзгорон, агар имрӯз ба ин масъала руҷӯъ кунем, фардо кори таълиму тарбия дар дарсҳои забон ва адабиёт осон шуда, муҳимтар аз ҳама, покизагӣ ва салосати забони бостониамон нигаҳ дошта мешавад.
Гулчеҳра САФАРОВА, омӯзгори МТМУ № 24, ноҳияи Фирдавсӣ
Баёни ақида (0) Санаи нашр: 30.11.2019 №: 227 Мутолиа карданд: 3787
