ҳуқуқ
"ИДГАРДАК,БИЁЕД БИАНДЕШЕМ!"
Посух ба матлаби "Ҷумҳурият"
Мақомоти иҷроияи маҳаллии ҳокимияти давлатии ноҳияи Темурмалик мақолаи «Идгардак. Биёед биандешем!» - ро, ки дар рӯзномаи «Ҷумҳурият» № 158, аз 19 августи соли 2019 нашр шудааст, дар машварати кории назди раиси ноҳия бо иштироки роҳбарони ташкилоту муассисаҳо, раисони ҷамоатҳо, раисони кумитаҳои маҳал ва ходимони дин мавриди баррасӣ ва тадбирҷӯӣ қарор дод.
Воқеан ҳам, саҳнаи дар мақола нишондода ҳузнангез буда, боиси андешаи ҷиддӣ мебошад. Кам нестанд далелҳое, ки дар рӯзҳои идҳои Рамазону Қурбон мардум, махсусан кӯдакон гурӯҳ – гурӯҳ шуда, ба ҳар як хона барои гирифтани ҳадияи идона рафтуомад карда, ҳатто ба баъзе хонаҳо зиёда аз 500 нафар мераванд ва рӯирост ҳадия талаб мекунанд.
Мутаассифона, баъзе оилаҳои камбизоат қудрати қонеъ гардондани талаботи ҳамаи онҳоро надошта, дар хиҷолат мемонанд. Кӯдакон ва баъзан ноболиғоне, ки ҳанӯз қоидаҳои ҳаракат дар роҳро намедонанд, ҳини равуо ҳаёташонро зери хатар мегузоранд.
Бо назардошти ин ва дигар омилҳо зимни баррасии мақола хулоса карда шуд, ки дар ҳудуди ноҳия минбаъд «Идгардаки ҳадияталбӣ» ба танзим дароварда шуда, пеши роҳи он гирифта шавад.
Замоне фаро расидааст, ки мо бояд бо фарҳанги воло тамоми ҷашну маросимҳои миллиамонро доир намоем ва аз ҳар гуна рафторҳои ба фарҳанги мо зиёновар даст кашида, фарзандонамонро аз хурдӣ дар роҳи дуруст ҳидоят намоем.
Аз ин рӯ, дар доираи талаботи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» волидон, омӯзгорон, ходимони дин ва масъулини ҷамоатҳои шаҳраку деҳот вазифадор карда шуданд, ки фарзандонро бо роҳи дуруст тарбия намуда, онҳоро аз одатҳои номақбул боздоранд.
Р. ТАЛБАКЗОДА, муовини раиси ноҳияи Темурмалик
Баёни ақида (0) Санаи нашр: 03.12.2019 №: 228 Мутолиа карданд: 1387
