фарҳанг
"ЧЕҲРАҲОИ МОНДАГОР". ЧАНД ПЕШНИҲОДИ МУҲИМ
Бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ гардидани озмуни ҷумҳуриявии «Фурӯғи субҳи доноӣ…» барои ҷалби бештару беҳтари аҳли ҷомеа ба китобхониву донишандӯзӣ ҳамаҷониба мусоидат намуд. Бо назардошти талаботи низомномаи озмуни мазкур дар муассисаи таҳсилоти миёнаи умумии рақами 18, ноҳияи Фирдавсӣ силсилаи чорабиниҳо баргузор гардиданд. Аз ҷумла, суҳбату вохӯриҳо бо адибон, конференсияи хонандагон бахшида ба санаву ҷашнвораҳои таърихӣ ва намоиши китобу мусаввараҳо, ташкил карда шуданд. Намоиши асарҳои Пешвои миллат, бахусус китоби «Чеҳраҳои мондагор» хеле ҷолибу хотирмон сурат гирифт.
«Чеҳраҳои мондагор» дар асоси зиндагиномаи ибратомӯзи фарзонафарзандони халқи тоҷик, ки ҳар кадом дар пешрафти фарҳангу тамаддуни миллӣ ва башарӣ саҳми босазо гузоштаанд, навишта шудааст.
Он аз бахшҳои «Бунёдгузори давлати мутамаддин» (Куруши Кабир), «Парчамбардори ҷодаи озодиву истиқлол» (Спитамен), «Паёмбари оини ростин» (Зардушт), «Бозтоби нур дар зулмот» ва «Пешвои мардумдӯсти Эрони бостон» (Монӣ ва Маздак), «Бузургтарин марди ҷаҳон ва паёмбари дини барҳақ» (Муҳаммад (с)), «Асосгузор ва пешвои мазҳаби таҳаммулгаро» (Имоми Аъзам), «Абармарди хираду сиёсат» (Исмоили Сомонӣ), Қофиласолори адабиёти тоҷику форс» (Рӯдакӣ), «Ситоишгари адлу дӯстӣ» (Фирдавсӣ), «Мутафаккири абадзинда» (Сино), «Суханвари бузург ва марди андеша» (Носири Хусрав), «Шахсияти бузург ва камназири олами ирфон» (Шамси Табрезӣ ва Ҷалолиддини Балхӣ), «Таблиғгари сохтори сулҳ ва ваҳдату субот» (Мир Сайид Алии Ҳамадонӣ), «Бунёдгузори кохи азими сухан» (Камоли Хуҷандӣ), «Пешвои ҳавзаи илмиву адабии Мовароуннаҳру Хуросон» (Абдураҳмони Ҷомӣ), «Нобиғаи шеър ва пайвандгари ду кишвар» (Бедил), «Суханвари номвари адабиёти тоҷик» (Туғрал), қаҳрамонони Тоҷикистон: Садриддин Айнӣ, Нусратулло Махсум, Шириншоҳ Шоҳтемур, Бобоҷон Ғафуров ва Мирзо Турсунзода ва «Мусаннифи таърихи пурфоҷиаи халқ» (Сотим Улуғзода) иборат аст.
Бисёр хуб мешуд, агар омӯзиши китоби «Чеҳраҳои мондагор» - и Пешвои миллат дар нақшаҳои таълимии муассисаҳои таҳсилоти миёнаи умумии кишвар ворид карда шавад. Ин иқдом ба афзудани ҳисси худшиносиву ватанпарастии онҳо мусоидат менамояд.
Ҳамзамон, дар байни хонандагони синфҳои болоӣ аз рӯи китоби «Чеҳраҳои мондагор» - и Пешвои миллат баргузории озмуну маҳфилҳои гуногун мувофиқи мақсад аст, зеро ҳангоми мутолиаи китоби мазкур шахсро ҳаяҷон фаро гирифта, таърихи пуртазоди миллати тамаддунофару фарҳангпарвари тоҷик пеши назараш ҷилвагар мешавад ва ифтихор аз тоҷик будан мекунад. Ин китоби пурмуҳтаво аз зиндагӣ ва осори аҷдодони бузургу барӯманди мо – ориёитаборон ҳикоят мекунад, ки номашон дар сафҳаи таърихи башар бо хати заррин сабт гардидааст.
Ба андешаи мо, агар бахшҳои китоби «Чеҳраҳои мондагор» - и Пешвои миллат дар шакли китобчаҳои алоҳида ба нашр расида, дастраси хонандагони сершумори муассисаҳои таҳсилоти миёнаи умумӣ мегардид, хело хуб мешуд.
Бону ШОДИЕВА, мудири китобхонаи МТМУ № 18, ноҳияи Фирдавсӣ
Баёни ақида (0) Санаи нашр: 04.12.2019 №: 229 Мутолиа карданд: 960
