маориф
РАҲНАМОИ МИЛЛАТ
Мутафаккир, донишманди шаҳири тоҷик Мир Сайид Алии Ҳамадонӣ дар китоби машҳури худ “Захират-ул-мулук” оид ба оини сарварӣ андешаҳои ҷолибро баён карда, нуҳ шарти сарварӣ, давлатсолорӣ, сиёсатмадориро хеле муъҷаз баён доштааст. Яке аз шартҳои оини сарвариро Ҳамадонӣ чунин мешуморад, ки сарвар, ҳоким, подшоҳ дар ҷараёни ҳаллу фасли корҳои давлатӣ ҳамеша ба илму маърифат, яъне уламо ва донишмандон такя менамояд.
Оини сарварӣ, давлатдорӣ, мардумсолорӣ, рафтору амали Пешвои миллат муҳтарам Эмомалӣ Раҳмон ба ин фармудаҳои Ҳамадонӣ созгор ва пойдор аст. Эмомалӣ Раҳмон аз нахустин қадамҳои хеш ба арсаи сиёсат ҳамеша ба илму хирад, маърифат, дониш, адлу инсоф такя намуда, зимоми давлатдориро бо дасти хирад идора мекунанд. Эмомалӣ Раҳмон рӯзи дуюми ба сифати Сарвари давлат ба пойтахти ҳанӯз ноорому нобасомон - Душанбе омаданашон нахуст бо аҳли илму адаб мулоқот ва маслиҳату машварат ороста буданд.
Мулоқотҳои анъанавии Пешвои муаззами миллат бо аҳли зиё дар арафаи Наврӯзи Аҷам ва Дарси сулҳи Президент дар Рӯзи дониш, дар оғози соли нави таҳсил далели хираддӯстӣ, маорифпарварӣ ва адабпарварии ин Сарвари наҷиб аст.
Мулоқоти навбатии Президенти мамлакат бо намояндагони аҳли маориф, олимон ва зиёиён, ки дар Донишкадаи идоракунии давлатии назди Президенти Ҷумҳурии Тоҷикистон 1 сентябр баргузор гардид, аз собитқадамии сиёсати маънавибунёди Пешвои миллат шаҳодат медиҳад. Дар ин мулоқот андешаҳои созандаву хирадмандона ва ҳидоятҳои раҳнамунсоз садо доданд.
Пешвои миллат дар суханронии худ вазъи кунунии ҷараёни ислоҳот дар соҳаи маориф ва рушди онро хеле дақиқ таҳлил намуда, аз пешравиҳо, комёбиҳо ва камбудиҳои ҷойдошта ёдрас шуданд. Зикр намуданд, ки имрӯз масъалаи аз ҳама муҳим ва калидӣ баланд бардоштани сатҳу сифати таълим, тайёр кардани мутахассисони ҷавобгӯ ба талаботи замон ва меъёрҳои ҷаҳони муосир мебошад.
Президенти кишвар ба омӯхтани илмҳои дақиқ, забонҳои русиву англисӣ, мутолиаи бештари китоб, аз худ кардани забони модарӣ, таъриху фарҳанги миллӣ, донишҳои ҳуқуқӣ ва иқтисодӣ таваҷҷуҳи аввалиндараҷа зоҳир намуда, устодони макотиби миёнаву олиро ба баланд бардоштани сатҳи касбияти худ даъват намуданд.
Мувофиқи ҳидоятҳои Сарвари давлат, устодон, омӯзгорон, кормандони соҳаи маориф баҳри таҷдиди назар ба соҳаи маориф, таҳияи барномаҳои нави ислоҳот, таълиму тарбия кӯшиш намоянд ва дар ободиву пешрафти кишвар саҳмгузор бошанд.
Шавкат ШАРИФОВ,
Иброҳим ҶАББОРОВ,
устодони ДДХ ба номи академик Бобоҷон Ғафуров
Баёни ақида (0) Санаи нашр: 05.12.2019 №: 230 Мутолиа карданд: 2589
