энергетика
ЭНЕРГЕТИКА СОҲАИ ПЕШБАРАНДАИ ИҚТИСОДИ ТОҶИКИСТОН
Пешрафти энергетикаро дар Тоҷикистон олимони иқтисодшинос барои нигоҳдории рушди босуботу устувори иқтисодиёт, аз ҷумла афзоиши неруи содиротии кишвар, ғанӣ гардондани Буҷети давлатӣ, коҳиш додани таъсири хатарҳои буҳрони иқтисодӣ, пойдории қурби пули миллӣ ва таъмини шуғли пурмаҳсули аҳолӣ аввалиндараҷа меҳисобанд. Истифодаи захираҳои фаровони гидроэнергетикӣ метавонад Тоҷикистонро дар арсаи байналмилалӣ ба давлати содироткунандаи азими неруи барқи аз ҷиҳати экологӣ тоза табдил диҳад.
НБО «Роғун», ки бо талошу заҳматҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастгириҳои мардуми шарифи кишвар бунёд мешавад, тарҳи азим ва заминаи мустаҳкамест барои истифодаи захираҳои бузурги гидроэнергетикӣ ва пешрафту шукуфоии Ватани азизамон– Тоҷикистон. Ифтитоҳи агрегати якуми НБО «Роғун» 16 ноябри соли 2018 дар Рӯзи Президенти Ҷумҳурии Тоҷикистон муждае аз марҳилаи нави рушд буд. Ин рӯйдоди муҳим дар таърихи навини Тоҷикистон бо ҳарфҳои заррин сабт шуд. Ҳамин тавр, 9 сентябри соли равон ба муносибати Ҷашни 28 - умин солгарди Истиқлолияти давлатӣ агрегати дуюми неругоҳ ба кор даромад.
Моҳи марти соли равон оид ба сохтмони ду неругоҳи барқи обӣ дар дарёи Зарафшон байни ҷумҳуриҳои Тоҷикистону Ӯзбекистон созишнома ба имзо расид, ки боз як қадами дигар дар ҷодаи рушди энергетикаи мамлакат мебошад.
Ҳамчунин, лоиҳаи таҷдиди Неругоҳи барқи обии “Норак” дар ду марҳала бо ҷалби 6 миллиард сомонӣ амалӣ гардида истодааст. Дар самти татбиқи лоиҳаи таҷдиди Неругоҳи барқи обии “Сарбанд” ба маблағи 1,1 миллиард сомонӣ корҳо оғоз ёфта, агрегати якуми он дар ояндаи наздик ба кор андохта мешавад. Неругоҳи барқи обии “Қайроққум” яке аз куҳантарин неругоҳҳои калони кишвар буда, аз соли 1957 мавриди истифода қарор дорад. Барои таҷдиди ин неругоҳ 600 миллион сомонӣ ҷалб гаштааст. Татбиқи лоиҳа соли оянда оғоз меёбад. Дар маҷмӯъ, барои таҷдиди неругоҳҳои амалкунанда сарфи беш аз 8 миллиард сомонӣ пешбинӣ шудааст.
Бунёди пурраи Неругоҳи барқи обии «Роғун» ба мо имкон медиҳад, ки ба истиқлолияти комили энергетикӣ муваффақ гардида, корхонаҳои азими саноатӣ таъсис диҳем ва тавассути содироти неруи барқ ба кишварҳои минтақа Буҷети давлатро ғанию диёри худро ободтар созем.
Мардуми Тоҷикистон бо сарварии Пешвои муаззами миллат муҳтарам Эмомалӣ Раҳмон бори дигар ба ҷаҳониён қудрати хешро нишон ва аз рисолати азалии созандагӣ дарак дод. Баъди ба кор даромадани чархаҳои аввали НБО «Роғун ва рӯи кор омадани иқтидорҳои нави энергетикӣ умеди мардум ба ояндаи дурахшон боз ҳам қавитар гардид. Сокинони кишвар аз ин корнамоию пешравиҳо рӯҳу илҳоми тоза гирифта, пайи якдилона обод сохтани Ватан камари ҳиммат мустаҳкамтар бастаанд.
Бахтиёр ҚУРБОНОВ, донишҷӯи факултети молия ва қарзи ДДМИТ
Баёни ақида (0) Санаи нашр: 17.12.2019 №: 239 Мутолиа карданд: 12626
