туризм
ТОҶИКИСТОН – КИШВАРИ САЙЁҲӢ
Тоҷикистонро дар олам ҳамчун кишвари обҳои мусаффо, кӯҳҳои сарбарафлок, ёдгориҳои қадима ва дорои фарҳанги пурғановат мешиносанд. Аз як ҷиҳат таъриху тамаддуни Тоҷикистон ба сайёҳон ҷолиби диққат бошад, аз ҷониби дигар релйеф ва ҷуғрофиёи Тоҷикистон барои намудҳои гуногуни сайёҳӣ, аз қабили кӯҳнавардӣ, экологӣ, шӯхпаймоӣ, табобатӣ ва таърихиву фарҳангӣ, созгор мебошад.
Ин аст, ки тайи солҳои соҳибистиқлолӣ бо мақсади рушд ва тақвият бахшидани соҳаи сайёҳӣ як қатор санад ва барномаҳои давлатӣ, аз ҷумла қонунҳои Ҷумҳурии Тоҷикистон “Дар бораи туризм”, “Дар бораи иҷозатномадиҳӣ ба баъзе намудҳои фаъолият”, Консепсияи “Рушди туризм барои солҳои 2009 – 2019”, “Дар бораи барномаи рушди туризм дар Тоҷикистон давраи солҳои 2015 – 2017”, “Дар бораи нақша чорабиниҳо оид ба беҳтар намудани фазои сармоягузорӣ дар бахши туризм дар Ҷумҳурии Тоҷикистон” қабул гардидаанд.
Дар баробари ин, баҳри боз ҳам тақвият бахшидани корҳо дар ин самт моҳи майи соли 2017 бо Қарори Ҳукумати Ҷумҳурии Тоҷикистон Кумитаи рушди сайёҳӣ таъсис ёфт. Ҳамзамон, ба хотири ҷалби бештари сайёҳон ҳуҷҷатгузории электронӣ роҳандозӣ гардида, тавассути воситаҳои ахбори омма иқтидори сайёҳии кишвар тарғибу ташвиқ мешавад ва инфрасохтори соҳа тибқи талаботи байналмилалӣ бунёду навсозӣ мегардад. Аз ҷумла, тайи солҳои ахир дар кишвар зиёд намудани хатсайрҳо, бунёди меҳмонхонаҳои муосир ва таъмиру таҷдиди роҳҳо авҷи тоза касб намуда, симои Ватани маҳбубамонро ба куллӣ тағйир додаанд. Ҳамчунин, бо мақсади ҷалби бештари сайёҳон ба мавзеъҳои таърихӣ аз ҳисоби Буҷети давлатӣ дар гӯшаву канори гуногуни мамлакат зиёда аз 70 ёдгории таърихиву фарҳангӣ ва меъморӣ барқарор гардид.
Ин тадбирҳои андешидаи Ҳукумати кишвар самараи нек ба бор меоваранд ва сол ба сол теъдоди ташрифи сайёҳони хориҷӣ ба Тоҷикистон меафзояд. Чуноне иттилоъ дода мешавад, беш аз ҳама ба сарзамини биҳиштосои мо сайёҳон аз Россия, Беларус, Ӯзбекистон, Хитой, Корея, Қазоқистон, Қирғизистон, Ҳиндустон, Фаронса, ИМА ва Олмон меоянд.
Тибқи маълумоти Созмони ҷаҳонии сайёҳӣ солҳои оянда Осиёи Марказӣ ба яке аз минтақаҳои асосии сайёҳии ҷаҳонӣ дар қораи Осиё табдил хоҳад ёфт. Ва ин бозгӯи он аст, ки Тоҷикистон метавонад бо имкониятҳои фарохи сайёҳии худ дар наздиктарин фурсат суди зиёд ба даст оварад.
Парвина РАҶАБЗОДА, судяи Суди Олии иқтисодӣ
Баёни ақида (0) Санаи нашр: 17.12.2019 №: 239 Мутолиа карданд: 2316
