ҳуқуқ
ҶИНОЯТ ва ҶАЗО
ТЕРРОРИЗМ
Боз як ҷангҷӯи «Давлати исломӣ» ба 15 сол ҳабс шуд
Суди ноҳияи Спитамен Шуҳратҷон Сатимов, сокини Ҷамоати деҳоти Истиқлолро бо ҷурми иштироки ғайриқонунӣ дар воҳидҳои мусаллаҳ, задухӯрди мусаллаҳона ё амалиёти ҷангӣ дар қаламрави дигар давлатҳо 15 сол аз озодӣ маҳрум кард.
Тибқи иттилои маркази матбуоти Прокуратураи генералӣ, Ш. Сатимов замони дар хориҷи кишвар қарор доштанаш, ба гурӯҳҳои ифротгаро пайваста, дар ҳайати иттиҳоди ҷиноятии ба ном «Давлати исломӣ» дар ҷангҳои қаламрави Сурияву Ироқ иштирок намудааст.
Дар ин робита моҳи августи соли 2015 прокуратураи ноҳияи Спитамен алайҳи ӯ бо моддаи 4011 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда, нисбат ба номбурда кофтуков эълон намуд. Шуҳратҷон Сатимов тобистони соли ҷорӣ дастгир гардида, бо ҳукми суд ба зиндон маҳкум гашт. Вай муҳлати ҷазои таъйиншударо дар муассисаи ислоҳии низомаш сахт сипарӣ хоҳад кард.
АВБОШӢ
Милитсия амали кордбадастонро тафтиш мекунад
Кормандони ШВКД - 1 дар ноҳияи Синои шаҳри Душанбе нафареро ба гумони авбошӣ дастгир намуданд, ки як сокини ноҳияи Рӯдакиро бо зарби корд маҷрӯҳ кардааст.
Бино ба иттилои дафтари матбуоти Вазорати корҳои дохилӣ, ҳодиса шаби 13 ба 14 декабр дар кӯчаи Гипроземи шаҳри Душанбе рух дода, марди 24 - солаи сокини ноҳияи Мир Сайид Алии Ҳамадонӣ ҳамчун гумонбар дар содир намудани ҷинояти авбошӣ дастгир шудааст. Ошкор гаштани ин ҷинояти авбошӣ дар пайи аризаи марди ҷабрдида ба мақомоти милитсия муяссар гардидааст.
Ҳамчунин, кормандони милитсия дар шаҳри Ҳисор ҳодисаеро ошкор намуданд, ки марди 45 – сола дар ҳолати мастӣ як сокини деҳаи Мортеппаро бо корд захмӣ ва ба ӯ ҷароҳати ҷисмонӣ расондааст.
Ба таъкиди манбаъ, ҳоло аз рӯи ин ҳодисаҳо тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 18.12.2019 №: 240 Мутолиа карданд: 711
