ҳуқуқ
ҶИНОЯТ ва ҶАЗО
МАВОДИ ТАРФГАРӢ
Қочоқбарон боздошт ва ба ҷавобгарӣ кашида шуданд
Кормандони раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд зимни як амалиёт дар минтақаи ноҳияи Ҷаббор Расулови шоҳроҳи Душанбе – Чанак аз дохили нақлиёти тамғаи «Мерседес - Бенс», ки таҳти идораи Дилшодҷон Ҳодибоев қарор дошт, маводи тарфгариро ошкор ва мусодира карданд.
Дар ин бора маркази матбуоти агентӣ хабар дод. Бино ба иттилои манбаъ, дар натиҷаи азназаргузаронии бордони нақлиёт аз дохили он 200 баста маводи тарфгарии навъи «хлопушка» дарёфт шудааст. Кормандони агентӣ муайян карданд, ки маводи тарфгариро сокини ноҳияи Бобоҷон Ғафуров Абдуғаффор Манонов 27 ноябри соли 2019 аз Ҷумҳурии Қирғизистон бо роҳи қочоқ ба Ҷумҳурии Тоҷикистон ворид кардааст.
Вобаста ба ин ҳолат нисбат ба А. Манонов ва дигар шарикон бо моддаи 1991 қисми 2 (муомилоти ғайриқонунии маводи тарфгарӣ (пиротехникӣ) Кодекси ҷиноятӣ парвандаи ҷиноятӣ оғоз гардида, тафтиши пешакӣ идома дорад.
ДУЗДИИ 700 000 СОМОНӢ
Ҷиноят ошкор ва гумонбар дастгир гардид
Як сокини пойтахт, ки дафтари матбуоти Вазорати корҳои дохилӣ аз ӯ марди 20 - сола ном мебарад, ба гумони дуздии 700 000 сомонӣ аз дохили воситаи нақлиёте дар Душанбе боздошт шуд.
Тибқи иттилои маркази матбуоти ВКД, гумонбар дар содир намудани ҷинояти дуздӣ баъд аз муроҷиати марди 28 - солаи сокини ноҳияи Рӯдакӣ ба ШВКД - 1 дар ноҳияи Фирдавсӣ аз ҷониби маъмурони милитсия дастгир гардидааст. Ҳодиса дар кӯчаи Деҳотии пойтахт ба амал омада, боздоштшуда бо роҳи шикастани тирезаи воситаи нақлиёт ин миқдор маблағро рабудааст.
Феълан аз рӯи ин ҳодиса тафтишот идома дорад.
БАЛҶУВОН
Милитсия ба дасти чорводуздон завлона зад
Кормандони мақомоти корҳои дохилӣ дар ноҳияи Балҷувон ду сокини деҳаи Зарнисори ноҳия – мардони 29 ва 35 - соларо ба гумони дуздии чорво дастгир намуданд.
Маркази матбуоти ВКД хабар дод, ки гумонбарон 15 декабри соли ҷорӣ аз чарогоҳи деҳаашон бо роҳи пинҳонӣ 3 сар чорвои калони шохдор, ки арзишашон 20 000 сомониро ташкил медиҳад, дуздидаанд. Ин кирдори ҷинояткорона аз ҷониби кормандони милитсия зуд ошкор гардида, ҳоло мавриди тафтишот қарор дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 24.12.2019 №: 246 - 247 Мутолиа карданд: 714
