туризм
ҲУНАРҲОИ МАРДУМӢ АЗ ОМИЛҲОИ МЕҲВАРӢ ДАР РУШДИ САЙЁҲӢ
20 июни соли 2019 аз ҷониби Сарвари давлат муҳтарам Эмомалӣ Раҳмон Қонуни Ҷумҳурии Тоҷикистон «Дар бораи ҳунармандӣ» ба имзо расид, ки заминаи устувор ва кафолатдиҳандаи рушди ҳунармандӣ буда, имкон медиҳад, то тадбирҳо ва барномаҳои нав баҳри рушди ин соҳа роҳандозӣ шаванд.
Тибқи қонун, масъалаҳои зиёди соҳаи ҳунармандӣ ҳал гардида, мақоми ваколатдори соҳа муайян карда мешавад ва Шӯрои ҳамоҳангсозии соҳаи ҳунармандӣ таъсис меёбад.
Бо мақсади таҳияи Барномаи рушди ҳунармандӣ дар Ҷумҳурии Тоҷикистон барои солҳои 2020-2022 бо фармоиши раиси Кумитаи рушди сайёҳӣ гурӯҳи корӣ ташкил шуда, айни замон раванди таҳияи барнома идома дорад.
Ҳунармандӣ мероси умдаи фарҳангии Тоҷикистон мебошад. Он бо тарзи зист ва расму оинҳо алоқаи ногусастанӣ дорад. Дар бораи рушди ҳунарҳои мардумӣ Сарвари давлат борҳо таъкид доштаанд. Солҳои охир барои эҳё ва рушди ҳунармандӣ ва фаъолияти озоду самараноки ҳунармандон тадбирҳои зиёд андешида мешаванд, то шуғли пурмаҳсул дар соҳаи сайёҳӣ таъмин шавад. Аз ҷумла, тибқи Қарори Ҳукумати Ҷумҳурии Тоҷикистон аз 13 феврали соли 2018, беш аз сад номгӯйи фаъолият оид ба истеҳсоли молҳои ниёзи мардум дар хона, ки фурӯш, иҷрои кор ва хизматрасонӣ вобаста ба онҳоро дар бар мегирад, аз пардохти ҳамаи намудҳои андоз озод шуд. Ба инҳо 104 касбу ҳунар, аз қабили атласу адрасбофӣ, шерозадӯзӣ, рассомӣ, ҳайкалтарошӣ, сангтарошӣ ва наю рубобсозӣ дохил мешаванд. Бар иловаи ин имтиёзҳо, косибон метавонанд патент ё шаҳодатномаи соҳибкорӣ ҳам нагиранд. Ба гуфтаи косибон, ин пешаҳо чандон даромади зиёд надоранд, аммо озод шудан аз андоз онҳоро ба пешаашон бештар дилгарм месозад.
Тибқи маълумоти Кумитаи рушди сайёҳӣ, айни ҳол дар ҷумҳурӣ 6805 ҳунарманд (ВМКБ 563, вилояти Хатлон 243, вилояти Суғд 1831, ноҳияҳои тобеи марказ 1424 ва шаҳри Душанбе 556) фаъолият дорад. Дар кишвар шумораи мағозаҳои фурӯши армуғонҳои сайёҳӣ ва ҳунарҳои дастӣ 140 -торо ташкил медиҳад, ки ба Вилояти Мухтори Кӯҳистони Бадахшон 7, вилояти Хатлон 55, вилояти Суғд 30, ноҳияҳои тобеи ҷумҳурӣ 13 ва шаҳри Душанбе 35 мағоза рост меояд.
Ҳунармандӣ соҳаест, ки дар радифи соҳаи сайёҳӣ рушд ёфта, ба пешрафти гардишгарӣ мусоидат менамояд. Ҳунарҳои мардумии мо дер боз ба меҳмонони хориҷии ба кишвари мо ташрифоваранда писанду мақбул аст. Ва имрӯзҳо бо ташаббуси Пешвои миллат ҳунарҳои мардумӣ, ки баъзеи онҳо ба гӯшаи фаромӯшӣ афтода буданд, аз нав эҳё гардиданд. Ҳунармандон аз ҳар гӯшаи кишвар бештар ҳавасманд мешаванд. Ҳунари онҳо на танҳо ба намоишгоҳҳои ҷумҳуриявӣ, балки байналмилалӣ низ роҳ ёфтаанд.
Бо ташаббуси Кумитаи рушди сайёҳӣ 27 – 28 майи соли 2019 дар ҳамкорӣ бо ҶСП «Си Эйч Эл Интернэшнл» дар саҳни меҳмонхонаи «Ҳилтон – Душанбе» таҳти унвони «Бозори баҳорӣ» («Spring Market») фестивал ва намоишгоҳи маҳсулоти ҳунармандӣ доир гардид, ки дар он ширкатҳои сайёҳии ватанию хориҷӣ, ҳунармандони тамоми минтақаҳои кишвар ва дигар истеҳсолкунандагони маҳсулоти миллӣ, ширкат намуданд. Бояд тазаккур дод, ки намоиши истеҳсоли маҳсулоти ҳунармандон ва хизматрасонии ширкатҳои сайёҳӣ бо услуби муосир тибқи талаботи байналмилалӣ ороиш ёфт. Ғайр аз ин, дар доираи Форуми байналмилалии сайёҳии “Тоҷикистон 2019” дар боғи фарҳангию фароғатии «Куруши Кабир» Намоишгоҳи байналмилалии сайёҳӣ ташкил шуд, ки дар он имкониятҳои сайёҳӣ ва армуғонҳои мамлакат ва кишварҳои хориҷӣ ба намоиш гузошта шуданд. Солҳои охир ҳунармандон бо маҳсулоти истеҳсолкардаашон дар чандин чунин намоишгоҳҳои байналмилалӣ дар дохил ва хориҷи кишвар фаъолона ширкат меварзанд.
Коршиносон бар он назаранд, ки ташкил ва баргузор намудани озмунҳо байни ҳунармандони кишвар оид ба истеҳсоли маҳсулоти сайёҳӣ ва армуғони беҳтарин ба эҳёи ҳунарҳои мардумӣ, таҳияи феҳристи ҳунармандони Ҷумҳурии Тоҷикистон ва рушди сайёҳӣ мусоидат менамояд. Бо ин мақсад, соли гузашта дар доираи Солҳои рушди деҳот, сайёҳӣ ва ҳунарҳои мардумӣ Кумитаи рушди сайёҳӣ байни ҳунармандони кишвар озмуни ҷумҳуриявӣ оид ба истеҳсоли армуғони беҳтарин барои сайёҳонро эълон кард. Озмун 10 январи соли 2020 ҷамъбаст гашта, беҳтаринҳо қадр шуданд.
Шаҳноз ҚУРБОН, «Ҷумҳурият»
Баёни ақида (0) Санаи нашр: 15.01.2020 №: 12 Мутолиа карданд: 2833
