иқтисод
БОҒПАРВАРӢ. ВОСИТАИ МУҲИМИ РУШДИ КИШОВАРЗӢ
Боғдорӣ ҳамчун соҳаи манфиатбахши кишоварзӣ манбаи даромад, омили баланд бардоштани сатҳи зиндагии шоистаи мардум, ҳамчунин, шукуфоии кишвар маҳсуб ёфта, дар меҳвари таваҷҷуҳи Ҳукумати мамлакат қарор дорад. Афзудани майдони боғу токзор ва вусъати корҳои сабзу хуррамгардонӣ дар сар то сари ҷумҳурӣ гувоҳи ин гуфтаҳоянд.
Хушоянд аст, ки имрӯзҳо иҷрои Барномаи “Рушди соҳаи боғу токпарварӣ дар Ҷумҳурии Тоҷикистон барои солҳои 2016 - 2020” ва бунёди боғу токзори нав дар хоҷагиҳои кишоварзии ҷумҳурӣ муташаккилона идома дорад. Тибқи маълумоти маркази матбуоти Вазорати кишоварзӣ, бо мақсади рушди соҳа ва иҷрои барнома соли гузашта дар ҷумҳурӣ дар масоҳати 3285,9 гектар (103,1 дарсади дурнамо) боғу токзори нав бунёд гардид, ки аз он 2938,4 гектарро боғ ва 347, 5 гектарро токзори нав ташкил медиҳад. Инчунин, 2359,3 гектар боғу токзори куҳна аз нав барқарор карда шуд.
Алҳол кишоварзон аз обу ҳавои мусоид самаранок истифода намуда, дар талу теппаҳои бо намӣ таъмин бунёди боғу токзори навро идома дода истодаанд.
Ба гуфтаи мутахассисони соҳа, боғдорон метавонанд ҳосилнокии миёнаи боғу токзорро аз ҳисоби баланд бардоштани ҳосилнокии дарахтони мевадиҳанда ва ҷорӣ намудани технологияи нави инноватсионӣ боз ҳам баланд бардоранд. Яке аз роҳҳои асосии расидан ба ин ҳадаф бунёди боғҳои интенсивӣ мебошад, зеро ҳосилнокии боғҳои интенсивӣ нисбат ба боғҳои муқаррарӣ чанд баробар зиёд аст. Соли гузашта дар ҷумҳурӣ дар масоҳати 197,7 гектар боғи интенсивӣ ва 3 гектар боғи ситрусӣ бунёд гардидааст.
Рушди боғу токзорро бе ривоҷи соҳаи ниҳолпарварӣ тасаввур кардан ғайриимкон аст, зеро солимӣ, дарозумрӣ, маҳсулнокӣ ва аз ҷиҳати иқтисодӣ самаранокии боғи нав аз навъи ниҳолҳои он вобастагии калон дорад. Самти асосии фаъолияти 13 хоҷагии ниҳолпарварии махсусгардондашудаи КВДҶ «Тоҷикниҳолпарвар» парвариш ва тайёр намудани ниҳоли дарахтони мевадиҳанда ва ҳамчун соҳаи ёрирасон истеҳсоли мева, ангур, ғалла, картошка, сабзавот ва полизиҳо мебошад.
Тавре Асомиддин Назарзода, сардори корхона, иброз дошт, бо мақсади иҷрои барномаи рушди соҳаи боғу токпарварӣ дар мамлакат ҳамасола хоҷагиҳои ниҳолпарварии корхона зиёда аз як миллион бех ниҳоли дарахтони мевадиҳанда, ток, тут, ороишию сояафкан тайёр менамоянд.
- Ба хоҷагиҳое, ки боғу токзор бунёд менамоянд, аз ҷониби мутахассисони корхона пайваста ёрии машваратию амалӣ расонда мешавад. Дар навбати аввал истеҳсоли он навъҳое ба роҳ монда шудааст, ки дар макони ҷойгиршавии хоҷагии ниҳолпарварӣ минтақабандӣ карда шудаанд. Раванди истеҳсоли ниҳолҳо дар хоҷагиҳо аз ҷониби нозирони раёсати назорати тухмӣ ва фитосанитарии Кумитаи бехатарии озуқавории назди Ҳукумати Ҷумҳурии Тоҷикистон назорат карда мешавад. Дар соли дуюми парвариши ниҳол ҳангоми гузарондани пайванд нозирону мутахассисон барои мушаххас намудани навъи пайванд ва тоза будани ниҳолон аз ҳашароту касалиҳои карантинӣ санҷишҳо гузаронда, санадҳои лозимӣ тартиб медиҳанд. Дар асоси санадҳои тартибдодашуда ба хоҷагӣ «Шаҳодатномаи мушаххаскунандаи навъи ниҳол» супурда мешавад, - изҳор дошт А. Назарзода.
Воқеан, рушди соҳаи боғдорӣ ба истифодаи самараноки заминҳои таллу теппа ва бекорхобида, афзоиши содироти мева ба хориҷи мамлакат, гирифтани даромади хуби иқтисодӣ, рушди деҳот, бунёди иншооти таъйиноти гуногун ва таъсиси ҷойҳои нави корӣ мусоидат мекунад.
Матлубаи АБДУҚАҲҲОР,
«Ҷумҳурият»
Баёни ақида (0) Санаи нашр: 22.01.2020 №: 16 Мутолиа карданд: 712
